Чӑваш Енре оборона комплексӗн ӗҫченӗсем валли аренда ҫурт-йӗрӗ тума пуҫлӗҫ. Кун пирки республика Элтеперӗ «Комсомольская правда» хаҫата панӑ интервьюра палӑртса хӑварнӑ.
Олег Николаев ӗнентернӗ тӑрӑх, Чӑваш Ен ҫурт-йӗр хӑпартассипе малта пыракан регионсен шутӗнче. Республика ӳлӗмрен те малтисен шутӗнче пуласшӑн.
«Президент аренда ҫурт-йӗрне тӑвассипе ҫине тӑрса ӗҫлеме хушать. Хальлӗхе — оборонӑпа промышленность комплексӗн ӗҫченӗсем валли. Эпир вӑл программӑна кӗме палӑртатпӑр. Асӑннӑ комплекса кӗрекен предприятисенче тӑрӑшакансене ҫурт-йӗр мӗн чухлӗ кирлине тишкертӗмӗр. Ку программа пурнӑҫа кӗме тытӑнсан ҫурт-йӗр хӑпартассин кӑтартӑвне чакармасӑр тӑрӑшма май килӗ», – тенӗ республика ертӳҫи.
Чӑваш Ен Элтеперӗн ятлӑ стипенди виҫине ӳстересшӗн. Вӗренӳ министерстви йышӑну проектне хатӗрленӗ.
Ҫак стипендие ҫулсерен 25 шкул ачине параҫҫӗ. Вӗсем пӗр ҫул, авӑн уйӑхӗнчен пуҫласа ҫурлаччен 400 тенкӗ илсе тӑраҫҫӗ. Ҫак тӳлев виҫине 1 пин тенке ҫитересшӗн. Ҫапла шкул ачисем уйӑхсерен 1 пин тенкӗ илсе тӑрӗҫ.
Палӑртмалла: ҫак стипендие 1999 ҫулта пама йышӑннӑ.
Паян – Пӗтӗм тӗнчери юн паракансен кунӗ. ЧР Элтеперӗ Олег Николаев телеграм-каналӗнче пӗлтернӗ тӑрӑх, Чӑваш Енре ҫулсерен 9 пин ҫын донор пулса тӑрать.
Олег Алексеевич хӑй те донор, вӑл ҫынсен пурнӑҫне ҫӑлма пулӑшнӑшӑн хӗпӗртенине палӑртнӑ.
ЧР сывлӑх сыхлавӗн министрӗ Владимир Степанов пӗлтернӗ тӑрӑх, Чӑваш Енре хальхи вӑхӑтра 4,4 пин Хисеплӗ донор шутланать. Пӗлтӗр юпа уйӑхӗнче 4,3 Хисеплӗ донор пулнӑ.
Кам-ха вӑл – Хисеплӗ донор? Ҫак ята 40 хутчен юн панӑ ҫынсем тивӗҫеҫҫӗ. Вӗсене ҫулсерен укҫан хавхалантараҫҫӗ. Кӑҫал ку тӳлев 16,58 тенкӗпе танлашать.
Паян Вӑрмар районӗнчи Ямпай ялӗнче ҫӗнӗ культура ҫурчӗ уҫӑлнӑ. Ӑна "Клуб йышши муниципалитет учрежденийӗсен строительстви тата модернизацийӗ" республикӑри ҫумпрограмма пулӑшнипе хута янӑ.
"Халӗ ку тата ҫывӑхри ялсенче пурӑнакансен пултарулӑхне аталантарма май пулӗ. Кунта условисем хальхи пурнӑҫпа килӗшсе тӑраҫҫӗ, аппаратура лайӑх, зал хӑтлӑ. Вӑхӑта туслӑ, усӑллӑ ирттерме пулать", - тенӗ ЧР Элтеперӗ Олег Николаев.
Куславкка районӗнчи Аслӑ Куснар ҫывӑхӗнче туса лартнӑ асӑну комплексӗнче (ӑна Сӑр тата Хусан хӳтӗлев чиккисене чавнӑ паттӑрсене халалланӑ) ҫӗр ҫийӗн каҫмалли каҫӑ тӑвасшӑн. Ҫапла пӗлтернӗ ЧР Элтеперӗ Олег Николаев.
Элтепер палӑртнӑ тӑрӑх, асӑну комплексне ҫын нумайрах та нумайрах килме тытӑннӑ. Ҫавӑнпа вӗсем валли хӑрушсӑр условисем туса памалла.
Олег Николаев "Волго-Вятскупрдор" пуҫлӑхне Илдар Мингазова каҫӑ тата стоянка тумашкӑн пулӑшма ыйтнӑ. Вӑл ку ыйтӑва пӑхса тухма шантарнӑ.
Паян, ҫӗртме уйӑхӗн 8-мӗшӗнче, пирӗн ҫӗршывра Социаллӑ ӗҫчен кунне уявлаҫҫӗ. Ҫав ятпа Чӑваш Ен Этеперӗ Олег Николаев та саламланӑ.
«Эсир пулӑшу кӗтекен ҫынсен чун-чӗрине ӑшӑ сӑмахпа ӑшӑтатӑр тата вӗсемшӗн ырми-канми тӑрӑ-шатӑр. Ырӑ кӑмӑллӑх, хӗрхенӳлӗх, ӑшӑ чунлӑх – сирӗн ӗҫӗре ҫак пахалӑхсемсӗр пурнӑҫлама та май ҫук.
Социаллӑ сферӑна аталантарасси, унти саккунсен никӗсне ҫирӗплетесси – патшалӑх политикин тӗп тӗллевӗ пулса тӑрать. Ачаллӑ ҫемьесене социаллӑ пулӑшу памалли ҫӗнӗ майсем ӗҫе кӗреҫҫӗ, вӗсене илсе тӑмалли йӗркесем палӑрмаллах ансатланаҫҫӗ», — тенӗ республика ертӳҫи.
Паянтан республикӑри тин ҫуралнӑ ачасене чӑааш тӗрриллӗ парне пама тытӑнмалла. Аса илтерер: ҫак йыша кӑҫал кӑрлач уйӑхӗн 1-мӗшӗ хыҫҫӑн ҫуралнӑ ачасем те кӗреҫҫӗ.
Ӗнер, уяв умӗн, ЧР Элтеперӗ Олег Николаев мӑшӑрӗпе Наталия Николаевӑпа тин кун ҫути курнӑ пепкесене ҫак парнепе пӗррӗмӗш хут чысланӑ. Чыслав Президент пепекелӗх центрӗнче иртнӗ.
Аса илтерер: "Тӗрӗллӗ парне" йышне чӑваш тӗрриллӗ таврашӗ, алшӑлли тата "Чӑваш Енри халӑхсен юмахӗсем" кӗреҫҫӗ.
СССР Халӑх вӗрентекенне Петр Чернова мӗн виличчен пособи пама йышӑннӑ. Хушӑва ЧР Элтеперӗ алӑ пуснӑ. Ҫапла вӑл уйӑхсерен 5 пин тенкӗ илсе тӑрӗ.
Петр Никифорович – 94 ҫулта. Вӑл Елчӗк районӗнчи Вырӑскасси ялӗнче ҫуралнӑ. Унӑн педагогикӑри пӗтӗмӗшле стажӗ 47 ҫулпа танлашать.
Петр Чернов – Чӑваш АССРӗн тава тивӗҫлӗ вӗрентекенӗ, РСФСР тава тивӗҫлӗ шкул учителӗ, СССР Халӑх вӗрентекенӗ, халӑх ҫутӗҫ отличникӗ.
Чӑваш Ен Элтеперӗ Олег Николаев шкултан вӗренсе тухакансене саламланӑ. Салама республикӑн влаҫ органӗсен официаллӑ порталӗнче вырнаҫтарнӑ.
Олег Николаев ачасене пӗлӳ илме ӑнтӑлнӑшӑн, педагогсемпе ашшӗ-амӑшне вара яш-кӗрӗме тӗнчене пӗлсе ҫитме пулӑшнӑшӑн, ҫӗршыва юрӑхлӑ ӑру ҫитӗнтернӗшӗн тав тунӑ.
«Сирӗншӗн пур ҫӗрте те — чи лайӑх аслӑ пӗлӳ паракан ҫуртсенче, колледжсенче, техникумсенче — ҫул уҫӑ», — тенӗ Элтепер.
«Кирек мӗнле профессие суйласа илсен те, хуть те мӗнле ӗҫ тусан та ҫакна асра тытӑр — суйласа илнӗ тивӗҫе хисеплени тата яваплӑ пурнӑҫлани, ҫӗршыва, унӑн паттӑрла историне, йӑли-йӗркине юратни, Аслӑ Раҫҫее хӳтӗлеме кирек хӑҫан та хатӗр пулни яланах хаклӑ пулнӑ», — палӑртса хӑварнӑ республика ертӳҫи.
Шупашкарта кӳлмекре Раҫҫейӗн тӗрленӗ карттин музейӗ пуласси пирки хыпарланӑччӗ. Ӑна ҫитес ҫул хута ямалла.
ЧР Элтеперӗ Олег Николаев ТАСС агентствӑна музей тумашкӑн мӗн чухлӗ укҫа кирлине пӗлтернӗ. 80 миллион тенке яхӑн.
"Строительство валли 40 миллион кирлӗ. Унтан музея хӑтлӑлатма укҫа кирлӗ пулӗ", - тенӗ Олег Алексеевич. Вӑл каланӑ тӑрӑх, кун валли тепӗр 40 миллион тӑкакланӗ.
Аса илтерер: унччен проектпа ӗҫ документацине хатӗрлеме, инженери ывтӑвӗсене татса пама 3,2 миллиона яхӑн тенкӗ уйӑрнӑ.
-10.7 °C