Федерацин налук службин Чӑваш Енри управленийӗ йӗркеленӗ «Эпӗ те налук тӳлекен пулӑп» конкурса Чӑваш Енри 51 шкултан 128 ача хутшӑннӑ. Палӑртма питӗ кӑмӑллӑ: ҫак йышран вуннӑшӗ иккӗмӗш тапхӑра лекнӗ.
Жюри хӑтлавсене хакласа ҫӗнтерӳҫӗсене палӑртнӑ. Пӗтӗмлетӳ тӑрӑх, конкурсра 1-мӗш вырӑна Максим Моряков (Тӑвайри П.Х.Бухтулов ячӗллӗ шкул), 2-мӗш вырӑна Георгий Малайкин (Шупашкарти 4-мӗш гимнази), 3-мӗш вырӑна Мария Моисеева (Шупашкарти 24-мӗш шкул) тухнӑ.
Ҫӗнтерӳҫӗсене Раҫҫейри налук органӗсен ӗҫченӗсен кунне халалланӑ уявра чыслӗҫ.
Ӗнер каҫхи 7 сехет ҫурӑра Атӑл леш енче «Tойота RAV 4» тата «Шупашкар – Хусан» маршрутпа ҫӳрекен микроавтобус пырса ҫапӑннӑ.
Малтанлӑха палӑртнӑ тӑрӑх, авари «Тойота» водительне пула сиксе тухнӑ. Вӑл, Калмӑк Республикинчи арҫын, ҫул пӑрӑнӑшӗнче хирӗҫ ҫул ҫине тухса маршруткӑпа ҫапӑннӑ. «Тойота» водителӗ ҫавӑнтах вилнӗ. Микроавтобусра пассажирсем пулнӑ, икӗ ҫын аманнӑ.
Патшалӑх автоинспекцийӗн ӗҫченӗ Никита Черноносов отпускра чухне ӳсӗр водителе тытса чарнӑ.
Чӳк уйӑхӗн 16-мӗшӗнче каҫхине полици лейтенанчӗ Стрелоксен 324-мӗш дивизийӗн урамӗнчи кафе умӗнче арҫын тайкаланса машина патне пынине, руль умне ларнине курнӑ. Вӑл тусӗпе Михаил Максимовпа пӗрле ун хыҫҫӑн кайнӑ. Светофор тӗлӗнче вӗсем ӑна хӑваласа ҫитнӗ.
Полицейски водителе чарсан хӑйӗнпе паллаштарнӑ. Анчах арҫын тытнӑ та вырӑнтан хускалса тарнӑ. Эгер бульварӗнчи 33-мӗш ҫурт картишӗнче водитель машинӑна хӑварса ҫуран тарма хӑтланнӑ. Анчах Никита Черноносов ӑна тытса чарнӑ та ӗҫтешӗсене вырӑна чӗнсе илнӗ.
Шупашкарта пурӑнакан 17 ҫулти яшӑн питех те курнӑҫланасси килнӗ. Ара вӑл питбайклӑ пулнӑ-ҫке. Пӗр кунхине каччӑ республикӑн Шалти ӗҫсен министерствин тата прокуратурин ҫурчӗсем умӗпе хӑйӗн мотоциклӗпе светофорӑн хӗрлӗ ҫутипе каҫса кайнӑ. Ҫав вӑхӑтра вӑл икӗ урапаллӑ транспортӑн хыҫалти урапи ҫинче ярӑнса пынӑ.
Кӑштахран ҫамрӑка тытса чарнӑ. Шлемсӑр ярӑннишӗн, светофрӑн хӗрлӗ ҫутине пӑхӑнманшӑн ӑна протокол ҫырса парса тултарнӑ, питбайкне туртса илнӗ.
Курнӑҫ ҫамрӑк ытти вырӑнта еплерех ярӑнса ҫӳренине камерӑсем тӑрӑх пӑхнӑ та вӑл йӗркене татах пӑснине тупса палӑртнӑ.
Ҫул ҫитменнисене вӑхӑтлӑх хупса хуракан центрта ҫӗр каҫнӑ хыҫҫӑн ирхине яш ӳкӗннӗ пек пулнӑ.
Чӑваш патшалӑх филармонийӗ ҫӗнӗ опера-мюзикла сцена ҫине кӑларассипе ҫине тӑрать. «Сказ о купеческой дочери и волшебном цветке» ӗҫе курма культура учрежденийӗ куракансене ҫитес уйӑхра, раштав уйӑхӗн 13 тата 14-мӗшӗсенче, йыхравлать.
Музыка спектакльне филармони республика Элтеперӗн укҫипе хатӗрлет.
Опера-мюзикла Сергей Аксаковӑн «Аленький цветочек» юмахне тӗпе хурса хатӗрленӗ. Финала хаваслӑн вӗҫлес тенӗ.
Либретто авторӗсем — Игорь Зубков тата Олег Машаров, композиторӗ — Игорь Зубков (Мускав), сӑвӑ авторӗ — Сергей Плотов (Мускав), режиссёрӗ — Олег Машаров (Мускав), хореографӗсем — Кристина Игнатьева, Сергей Ререкин, Ирина Гаврилова.
Шупашкар депутачӗн ывӑлӗ прицеп ҫинче илсе ҫӳренӗ икӗ ача вилнӗшӗн судра явап тытӗ. Калинин районӗн прокуратури айӑплава ҫирӗплетсе пуҫиле ӗҫе суда пӑхса тухма янӑ.
Следстви версийӗ тӑрӑх, кӑҫал ҫулла усламҫӑ ашшӗн (вӑл Шупашкар хула пухӑвӗн депутачӗ Юрий Борисов) субподрячӗпе муниципалитет контрактне пурнӑҫланӑ – Шупашкарта курӑк ҫулнӑ. Борисов-кӗҫӗнни ҫул ҫитмен 5 ачана ӗҫ килӗшӗвӗсем тумасӑр, хӑрушсӑрлӑх техникине вӗрентмесӗр, ӗҫ сыхлавӗшӗн яваплӑ ҫынна палӑртмасӑр ӗҫлеттернӗ. Ҫурлан 8-мӗшӗнче ҫак ҫамрӑксене саккуна пӑсса ҫӑмӑл автомашинӑн тентпа витнӗ прицепӗнче илсе кайнӑ. Ҫавӑнтах бензотриммерсем тата бензин канистрӗсем пулнӑ.
Сӗнтӗрвӑрри ҫулӗ ҫинче прицеп ҫунма тытӑннӑ. Икӗ ҫамрӑк пиҫсе кайнине пула темиҫе кунран пульницӑра вилнӗ. Тепӗр иккӗшӗн сывлӑхне йывӑр сиен кӳнӗ.
Тӗпчеве РФ Следстви комитечӗн Председателӗ Александр Бастрыкин тӗрӗслесе тӑнипе вӗҫленӗ. Прокуратура вилнӗ тата суранланнӑ ҫамрӑксен ҫемйисене кӑмӑл-сипет тӗлӗшӗнчен сиен кӳнӗшӗн тӑкака саплаштарма граждан тавӑҫӗсем тӑратнӑ.
Нумаях пулмасть Шупашкарта пурӑнакан Зинаида Котова 85 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтеркен комплекслӑ центрӑн пай пуҫлӑхӗ Александра Смиирнова саламланӑ.
«Ватӑ ҫынна паян пирӗн центрӑн социаллӑ ӗҫченӗ пӑхса пулӑшать. Анчах вӑл ачи-пӑчин пархатарне те курать. Зинаида Макаровнӑпа юнашар — унӑн ачисем, мӑнукӗсемпе мӑнукӗсен ачисем. Ватта хисепленӗренех ӗнтӗ вӗсем социаллӑ ӗҫчен пулӑшӑвӗпе усӑ кураҫҫӗ, юратнӑ ҫыннин пурнӑҫне ҫӑмӑллатма тӑрӑшаҫҫӗ», — каласа кӑтартнӑ Александра Львовна социаллӗ центрӑн пресс-службине.
Зинаида Макаровна Дон ҫинчи Ростовра ҫуралнӑ, Шупашкара мӑшӑрӗпе 1977 ҫулта куҫса килнӗ.
Шупашкарти шкулсенчен пӗринче православи музейӗ уҫнӑ.
Республикӑн Вӗренӳ министерствинче пӗлтернӗ тӑрӑх, хулари вӗренӳ учрежденийӗсем Шупашкарпа Чӑваш Ен епархийӗпе тачӑ ҫыхӑну тытаҫҫӗ. Шкулсенче православи культурине тарӑннӑн вӗренмелли классем те пур.
Шупашкарти 29-мӗш вӑтам шкулта халӗ православи культурин музейне уҫнӑ. Хӗрлӗ хӑйӑва каснӑ ҫӗре республикӑн Патшалӑх Канашӗн депутачӗ Николай Николаев, хула администрацийӗн вӗренӳ управленийӗн пуҫлӑхӗ Алексей Лукшин, Дмитрий Нестеренко протоиерей хутшӑннӑ.
Шупашкарти апатлану технологийӗпе коммерци техникумӗн студенчӗ Виталий Марков ҫар искусстви енӗпе иртнӗ тӗнче чемпионатӗнче ылтӑн медаль ҫӗнсе илнӗ. Ӑмӑрту Рим хулинче пулнӑ. Пирӗн ентеш «Solovyov Team» команда чысне хӳтӗленӗ.
Виталий 90 килограмран ытларах таякан спортсменсемпе вӑй виҫнӗ. Вӑл «Учкур» казак ҫапӑҫӑвӗнче 1-мӗш вырӑн йышӑннӑ, «Бокс-лайт» дисциплинӑра вара виҫҫӗмӗш пулнӑ.
Шупашкарти 38-мӗш шкулта вӗренекен ачасем паллӑ юрӑҫпа Элвин Грейпа тӗл пулнӑ.
Элвин Грей пӗлӳ ҫуртӗнче иртнӗ «Чӑнкӑ тӗлпулу» мероприятие хутшӑннӑ.
Унӑн чӑн ячӗпе хушамачӗ – Радик Юльякшин. Вӑл тутарла, вырӑсла, пушкӑртла юрлать.
Паллӑ юрӑҫ ачасене музыка карьерине мӗнле пуҫланине, хӑй мӗнле йывӑрлӑхсемпе тӗл пулнине каласа кӑтартнӑ.
Сӑмах май, вӑл ҫак кунсенче Шупашкарта концерт лартнӑ. 38-мӗш шкул ачисене те билетсем парнеленӗ.
+10.3 °C