Питӗр хулинчи Киров районӗнчи халӑхӑн социаллӑ ыйтӑвӗсене тивӗҫтерекен комплекслӑ центрта паян чӑваш юрри янӑранӑ. Унти ватӑсем патне концертпа «Парне» чӑваш халӑх фольклор коллективӗ пынӑ.
Чӑваш коллективне ҫӳрекенсем тӑван халӑхӑмӑрӑн «Кӗр сӑри» йӑла-йӗркине кӑтартса панӑ. Ку уява кӗрхи ӗҫсем вӗҫленсен мӗн авалтан ирттернӗ. Ҫавӑн чухне ҫӗнӗ сӑра вӗретсе ӗҫнӗ.
Питӗрти чӑвашсен «Парне» ансамбльне 15 ҫул ытла Татьяна Ильина ертсе пырать.
Раҫҫей Патшалёх Думин депутатне Анатолий Аксакова Чӑваш халӑх художникӗ, Чӑваш патшалӑх педагогика университечӗн профессоре, живопись ӑсти, Анатолий Данилов хӑйӗн картинине парнеленӗ. Кун пирки Анатолий Аксаков «Контактра» хыпарланӑ. Депутат пӗлтернӗ тӑрӑх, ӳкерчӗксем ӑна ачалӑхне Крымра ирттернине аса илтернӗ.
Кӑҫалхи нарӑс уйӑхӗнче художник Аксаковран пулӑшу ыйтнӑ-мӗн. Вӑл Чӑваш Енри тата Тутарстанри художниксем Крымри ӗҫтешӗсемпе тачӑ ҫыхӑну йӗркелеме, унта куравсемпе ӑсталӑх сехечӗсем ирттерме ӗмӗтленнине пӗлтернӗ.
Аксаков Крым муниципалитечӗн ертӳҫисемпе тӳрех ҫыхӑннӑ-мӗн, проекта пурнӑҫа кӗртме май килнӗ. Халӗ чӑваш художникӗ депутата тав туса хӑйӗн картинине парнеленӗ.
Юпа уйӑхӗн 25-мӗшӗнче Красноярскри чӑвашсен наципе культура автономийӗ Халӑхсен туслӑхӗн ҫуртӗнче Владимир Мешков ҫуралнӑранпа 105 ҫул ҫитнине халалласа пуҫтарӑнӗҫ.
Мероприяти Красноярск рабочий проспектри 100В ҫуртра иртӗ. Унта Шупашкар районӗнче ҫуралнӑ ентешӗмӗр, Владимир Мешков художникӑн куравӗ уҫӑлӗ.
Ӗнер, юпа уйӑхӗн 3-мӗшӗнче, Республикӑри кинематографистсен союзӗн ертӳҫи, «Сувар-фильм» телевидеокомпани президенчӗ, Халӑхсем хушшинчи Ҫеҫпӗл Мишши ячӗллӗ преми лауреачӗ Олег Цыпленков 65 ҫул тултарнине эпир унччен пӗлтернӗччӗ-ха.
Аса илтерер: Олег Цыпленков — чӑваш тӗнчин хастарӗ, Чӑваш Енри кинематографистсен союзӗн ертӳҫи ҫеҫ мар, вӑл «Чунҫӳрев» йӗркелекенӗ те.
Ӗнер Чӑваш Енӗн Наци вулавӑшӗнче Ултияр Цыпленковӑн фотокуравӗ уҫӑлнӑ. Курава унӑн ҫавра кунне те халалланӑ. Кун пирки Лидия Филиппова журналист мессенджерсенчи ушкӑнсенчен пӗринче пӗлтернӗ.
Чӑваш Ен делегацийӗ нумаях пулмасть Кабарда-Балкари Республикинче пулнӑ.
Йӑхташӑмӑрсене Нальчик чӑвашсен общество организацийӗн
председателӗ Алена Чернова ӑшшӑн кӗтсе илнӗ.
Чӑвашсене «Ҫӑлкуҫ» уйлӑхра
вырнаҫтарнӑ, республика тӑрӑх кӑтартса ҫӳренӗ.
Чӑвашсен делегацийӗ Кабарда-Балкари ҫӗрӗ ҫинче Чӳк ирттернӗ, юпа вырнаҫтарнӑ. Ӑна Алексей Казаков скульптор хатӗрленӗ.
Чӑваш Енре пурӑнакан ҫамрӑксем чӑвашла эрешлӗ татуировкӑсем тутарма юратаҫҫӗ. Кун пирки Телеграмри «Чувашский край» (чӑв. Чӑваш тӑрӑхӗ) каналта пӗлтернӗ.
Ӳт ҫине (ал-ура, мӑй тата ытти те) ҫине илемлӗ ӳкерчӗксем ӳкерсе хураҫҫӗ: эрешсем, элемсем, орнаментсем, рунӑсем... Пӗр-пӗр сӑмаха чӑвашла та ҫырса хураҫҫӗ.
Шупашкар муниципаллӑ округӗнчи «Ясна» этнокомплексра паян Пушкӑртстанри чӑвашсем пулнӑ.
Галина Григорьева-Айпикен халӑх тетелӗнчи хӑйӗн страницинче пӗлтернӗ тӑрӑх, вӗсем парнесемпе килнӗ, музея ҫӗнӗ экспонатсемпе пуянлатнӑ. Аякри йӑхиашӑмӑрсене чӑваш юррипе кӗтсе илнӗ.
«Тваткал пахчи, ҫырла пахчи.
Ҫырли пиҫсен илемлӗ.
Ах, Тор-Тор, панулми.
Татымап, ҫиимап,
Тӑвансӑр пуҫне пурнымастӑп.
Тӑван пӳрчӗ, тваткал пӳрчӗ.
Тӑвансем пухӑнсан илемлӗ.
Ай, Тор-Тор, панулми,
Татымап, ҫиимап,
Тӑвансӑр пуҫне пурнымастӑп...», — шӑрантарнӑ хӑнасене кӗтсе илнӗ май.
Чӑваш ачисен «Эткер» сменинче канакан ачасем «Чӑваш керем» этнокомплексра экскурсире пулнӑ.
Ирина Диарова чӑваш чӗлхи вӗрентекенӗ халӑх тетелӗнчи хӑйӗн страницинче пӗлтернӗ тӑрӑх, Сергей Сорокин ачасене музейри кашни япала ҫинчен тӗплӗн каласа панӑ, ыйтусене хуравланӑ. Ачасене почта историйӗ ҫинчен каласа пани уйрӑмах килӗшнӗ-мӗн.
«Чи кӑмӑлли вара парне пулчӗ. Сергей Лазаревич кашнинех кӗнеке парнелерӗ. Сӑн ýкерӗнни те, А.С. Пушкин сӑввисене чӑвашла вулани те ачасен асӗнче нумайлӑха асра юлӗ», — пӗтӗмлетнӗ Ирина Диарова.
Эрнекун, утӑ уйӑхӗн 19-мӗшӗнче, «НТВ» телеканалпа Леонид Агутинӑн пиллӗкмӗш вӗренӳ форумӗн гала-концертне кӑтартнӑ. 23 сехет те 40 минутра кӑтартнӑ телекӑларӑмра чӑвашсене те кӑтартнӑ.
Сцена ҫине Леонид Агутин, IOWA, Миа Бойко, Леон Кемстач, Владимир Пресняков, Анжелика Варум, Лариса Долина, Мот тата Антон Беляевсем тухнӑ. Унсӑр пуҫне Шупашкарти Татьяна Шереметьеван «5 октава» вокал студийӗн 8 солисчӗ юрланӑ.
110 пин ытла чӑваш пурӑнакан Пушкӑрт ҫӗрӗнче мӗнпур ентеше пӗрлештерекен «Уяв» тӑваттӑмӗш хут иртни ҫинчен «Чӑваш Ен» патшалӑх телерадиокомпанийӗн журналисчӗ Алексей Енейкин эфирта хыпарланӑ.
Вӑл пӗлтернӗ тӑрӑх, «Авӑркас ҫӗрӗ чӑвашсем йышлӑ пурӑнакан районсенчен пӗри шутланать. Унта кашни виҫҫӗмӗш ҫын чӑвашла калаҫать».
Пушкӑртстанра тӑван чӗлхепех хаҫатсем тухаҫҫӗ, шкулта ачасем чӑвашла вӗренеҫҫӗ. Авӑркас районӗнче Чӑваш культурин центрне тума пуҫланӑ. Икӗ ҫулта пӗрре Уяв ирттереҫҫӗ.
-9.7 °C