Чӑваш Ен Элтеперӗн Олег Николаевӑн ака уйӑхӗн 25-мӗшӗнчи 230-мӗш хушӑвӗпе килӗшӳллӗн пуҫлӑх пулмалли кадр резервне ҫӗнӗ ҫынна кӗртнӗ. Вӑл — «Барарус» тулли мар яваплӑ обществӑн директорӗ Валерий Григорьев.
Валерий Юрьевич муниципалитет районӗсемпе хула округӗсен администрацийӗсен пуҫлӑхӗсен должноҫне йышӑнмалли кадр резервӗнче пулӗ.
Сӑмах май каласан, Валерий Григорьев директор пулса ертсе пыракан предприяти учредителӗсем иккӗн: вӑл хӑй тата тепӗр ҫын. Асӑннӑ пӗчӗк организаци тӗрлӗ машинӑпа оборудовани, электротехника оборудовани сутать.
Паян, ака уйӑхӗн 21-мӗшӗнче, «Биологилле тасатмалли сооруженисем» патшалӑхӑн унитарлӑ предприятийӗн пуҫлӑхӗ пулма Максим Иванова ҫирӗплетнӗ. Хушӑва республика ертӳҫи Олег Николаев алӑ пуснӑ.
Асӑннӑ предприяти республикӑн Строительство, архитектура тата ҫурт-йӗрпе коммуналлӑ хуҫалӑх министерствине пӑхӑнать.
Ҫак саманта илсен, предприятин сайтӗнче предприяти тытӑмӗпе паллаштаракан ярӑмра хыпара ҫӗнетсе ӗлкӗреймен – Максим Иванова директор тивӗҫӗсене пурнӑҫлакан тесе кӑтартнӑ.
Раҫҫейри шкулсенче истори предметне 1-мӗш класранпа вӗрентме пуҫлӗҫ. Ҫапла пӗлтерет Ҫутӗм министерстви.
"Истори астӑвӑмӗ юлтӑр тесе тӑрӑшатпӑр. Шкулсенче истори предметне 1-мӗш класранпа вӗрентмелли пирки йышӑну турӑм", - тенӗ Сергей Кравцов министр.
Сӑмах май, халӗ ку предмета пӗлӳ ҫурчӗсенче 5-мӗш класран вӗрентеҫҫӗ.
Чӑваш Енӗн пӗрремӗш президенчӗ Николай Федоров пӗлтӗр мӗн чухлӗ ӗҫлесе илнӗ? Сенатор деклараци тӑратнӑ.
Николай Ваильевичӑн пӗлтӗрхи тупӑшӗ 11 миллион та 171 пин те 633 тенкӗпе танлашнӑ. Эппин, вӑл уйӑхне 900 пин ытла тенкӗ ӗҫлесе илнӗ.
Унӑн мӑшӑрӗ декларацире 727 пин те 577 тенкӗ кӑтартнӑ. Унӑн харпӑрлӑхӗнче виҫӗ ҫӗр лаптӑкӗ, 2 ҫурт тата мунча пур. Ҫӗр лаптӑкӗ пӗтӗмпе 6 пине яхӑн тӑваткал метрпа танлашать.
Николай Федоровӑн харпӑрлӑхӗнче - 265 тӑваткал метрлӑ хваттер тата пурӑнмалли мар ҫурт.
Чӑваш Енре агробиотехнопарк уҫӑлӗ. Ҫавна Раҫҫей Правительствин вице-премьерӗ Викторий Абрамченко та ырланӑ.
Агробиотехнопаркра пахча-ҫимӗҫпе ҫӗрулмине, хӑмлана тарӑннӑн тирпейлеме палӑртнӑ, унтах ӑратлӑх ӗҫне та аталантарӗҫ.
Проектра палӑртнӑ тӑрӑх, ген селекциллӗ лабораторисем ӗҫлеттерсе ярасшӑн.
«Агропрорыв» проекта ӗҫлеттерсе ярсан 2030 ҫул тӗлне пирӗн республикӑра ют ҫӗршывран ӑратлӑ выльӑх-чӗрлӗхпе ҫӗрулми туянасси 55 процент таран чакмалла, хӑмлан ҫӗнӗ сорчӗсемпе хамӑра 65 процент таран тивӗҫтермелле.
Шупашкар хула администрацийӗ 42-мӗш маршрут перевозчикӗпе, «Крокус Автопа», килӗшӗве пӑрахӑҫлӗ. Администраци кун пирки уведомлени янӑ.
Тӳре-шара ӑнлантарнӑ тӑрӑх, перевозчик ака уйӑхӗн 6-мӗшӗнченпе ӗҫлеме хирӗҫленӗ, 4 автобуса маршрута кӑларма пӑрахнӑ. Ҫапла майпа вӑл килӗшӳ условийӗсене пӑсать.
Ҫитес вӑхӑтра администраци урӑх перевозчик тупас тӗллевпе конкурс ирттерӗ. Конкурс пуличчен вӑхӑтлӑх перевозчик пулӗ-и е ҫук-и – паллӑ мар.
Паян ЛДПР парти лидерӗ Владимир Жириновский вилнӗ. Ку информацие официаллӑ майпах ҫиреплетнӗ. Хальхинче ку хыпар суя мар. Темиҫе кун маларах Жириновский вилнӗ тесе сас-хура тухнӑччӗ, анчах вӑл тӗрӗс мар пулнӑ.
Владимир Вольфович кӑшӑлвируспа чирленӗ, нарӑсӑн 2-мӗшӗнченпе пульницӑра выртнӑ. Тухтӑрсем юлашки кунӗччен унӑн пурнаҫӗшӗн кӗрешнӗ. Пӗр хушӑ вӑл медикаметозлӑ комӑра та выртнӑ. Анчах, шел те, политик йывӑр чире парӑнтарайман.
Владимир Жириновский 2021 ҫулта 75 ҫул тултарнӑ. Акан 25-мӗшӗнче 76-мӗш ҫуралнӑ кунне паллӑ тумаллаччӗ. Унпа Мускаври Союзсен ҫуртӗнче сывпуллашма палӑртнӑ. ЛДПР лидерне Троекуров ҫӑви ҫинче пытарӗҫ. Унта унӑн тӑванӗсем ӗмӗрлӗх канлӗх тупнӑ.
Раҫҫей банкӗн Чӑваш Енри управляющийӗ Александр Логвинов ӗҫрен кайнӑ. Вӑл пенсие тухнӑ. Управляющи тивӗҫӗсене пурнӑҫлама Юрий Голубыха шаннӑ.
Александр Логвинов пирки каласан, Раҫҫей банкӗн тытӑмӗнче вӑл 44 ҫул ӗҫленӗ. Регионти уйрӑма 2013 ҫултанпа ертсе пырать.
53 ҫулти Юрий Голубых управляющин заместителӗнче ӗҫленӗ. Вӑл Липецк хулинчен. Пӗтӗм Раҫҫейри финанспа экономика институтӗнчен вӗренсе тухнӑ. Раҫҫей банкӗн Чӑваш Енри управленийӗнче 2014 ҫултанпа ӗҫлет.
Паянтан, ака уйӑхӗн 5-мӗшӗнчен, Шупашкарта "Пирӗн Тӑван ҫӗршыв пӗрре" проект старт илет. Вӑл шкул ачисен патриотлӑх туйӑмне аталантарассипе ҫыхӑннӑ.
Проектпа килӗшӳллӗн, ачасем урокра Раҫҫей гимне юрлӗҫ. Шупашкар хула администрацийӗн пуҫлӑхӗ Денис Спирин пӗлтернӗ тӑрӑх, гимна ОБЖ тата истори урокӗсенче шӑрантарӗҫ.
"Кашни шкул график тӑвӗ. Ака уйӑхӗн 5-мӗшӗнчен "Россия - священная наша держава, Россия - великая наша страна" ачасен сассипе янӑрама пуҫлӗ", - ҫапла пӗлтернӗ сити-менеджер. Шупашкар хула администрацийӗн вӗренӳ управленийӗн пуҫлӑхӗ Елена Сахарова та ачасен ҫӗршыв гимнне пӗлмеллине, патриот пулмаллине палӑртнӑ.
Куславкка район администрацийӗн пуҫлӑхӗ пулма Алексей Людкова шаннӑ. Кун пек йышӑнӑва Депутатсен районти пухӑвӗн ӗнер, пуш уйӑхӗн 31-мӗшӗнче, иртнӗ черетсӗр ларӑвӗнче йышӑннӑ.
Людковпа контракта Куславкка районӗнчи Дпутатсен ҫиччӗмӗш созыври пухӑвӗ вӗҫленичченхи вӑхӑт таран алӑ пусса ҫирӗплетнӗ. Должноҫе пурнӑҫлама ҫӗнӗ пуҫлӑх паян, ака уйӑхн 1-мӗшӗнче, кӳлӗннӗ.
2020 ҫулхи авӑн уйӑхӗнчен пуҫласа Куславкка районӗн администрацине Фирдавиль Искандаров ертсе пынӑ. Кӑҫалхи пуш уйӑхӗн пуҫламӑшӗнче вӑл хӑйне ӗҫрен кӑларма ыйтса заявлени ҫырса панӑ.
-13.7 °C