Чӑваш Енре ҫӗнӗ вице-премьер пулӗ. Вӑл – Олег Николин. Хушӑва ЧР Элтеперӗ паян алӑ пуснӑ.
Олег Николин – Сӗнтӗрвӑрри хулинчен, вӑл унта 1973 ҫулта ҫуралнӑ. И.Н.Ульянов ячӗллӗ ЧПУран экономиста вӗренсе тухнӑ. Карьерине РФ ШӖМӗн шалти ӗҫсен органӗсенче пуҫланӑ. Карьерин пысӑк пайӗ, 25 ҫул, Перекет банкӗпе ҫыхӑннӑ. 2021 ҫулта Олег Валентинович Чӑваш Республикин Элтеперӗн Тав хутне тивӗҫнӗ. Вӑл авланнӑ, мӑшӑрӗпе икӗ хӗр ӳстереҫҫӗ.
Малтанлӑха палӑртнӑ тӑрӑх, ҫӗнӗ вице-премьер экономикӑпа тата финанссемпе ҫыхӑннӑ ыйтусем тӗлӗшпе ӗҫлӗ.
Сӗнтӗрвӑрри районӗн пуҫлӑхӗ пулнӑ Алексей Шумов пурнӑҫран уйрӑлнӑ. Алексей Александрович чылай вӑхӑт йывӑр чирленӗ хыҫҫӑн кӑрлачӑн 27-мӗшӗнче пурнӑҫран уйрӑлнӑ.
Алексей Шумов 1955 ҫулта Сӗнтӗрвӑрри районӗнчи Ӑстакасси ялӗнче ҫуралнӑ. 1995 ҫулта И.Н.Ульянов ячӗллӗ ЧПУн экономика фвакультетне пӗтернӗ, 2000 ҫулта Мари патшалӑх техника университечӗн строительство факультетӗнче диплом илнӗ.
2002 ҫулта Патшалӑх Канашӗн 3-мӗш чӗнӗвӗн депутатне суйланнӑ. 2005 ҫулта Сӗнтӗрвӑрри районӗн пуҫлӑхӗн пуканне йышӑннӑ. Унта 2009 ҫулччен ӗҫленӗ.
Алексей Шумовпа кӑрлачӑн 30-мӗшӗнче Сӗнтӗрвӑрринчи культура ҫуртӗнче 10-12 сехетсенче сывпуллашӗҫ.
Чӑваш Енри пульницӑсене пӗрлештерни ҫынсемшӗнех лайӑх. Ҫакӑн пекрех хуравланӑ республикӑн сывлӑх сыхлав министрӗ Лариса Тарасова тӳрӗ лини ирттернӗ вӑхӑтра.
Министр ӗнентернӗ тӑрӑх, реорганизаци хыҫҫӑн кадр ыйтӑвӗ лайӑхланать, ҫавна май ҫынсен черетре тӑма тивмӗ. Реорганизаци вӑхӑтӗнче пульницӑсене хупса пӗтермӗҫ, пӗрремӗш санитарипе медицина пулӑшӑвӗ кирлӗ пулсан унччен хӑнӑхнӑ ҫӗрех каймалла, вӗсенче ҫав тухтӑрсемех ӗҫлӗҫ,
Ҫав вӑхӑтрах ансӑр текен специалистсем патне ҫӑмӑллӑн лекме май килӗ. Унччен, сӑмахран, эндокринолог, кардиолог, невролог патне хӑш-пӗр тӑрӑхра тепӗр пульницӑна е уйрӑм ҫын клиникине кайма тивнӗ. Е тата хальхи вӑхатри хаклӑ медицина тӗрӗслевӗ (КТ, МРТ, эксперт класлӑ ультросасӑ тӗрӗслевӗ, эндоскопи диагностики тата ытти те) витӗр пысӑках мар муниципалитетсенче те ӳлӗмрен ҫӑмӑллӑнах тухма май килӗ.
Чӑваш Енри тӳре-шарана вӗрентме республика Правительствин резерв фондӗнчен 11,5 миллион тенкӗ укҫа уйӑрнӑ. Кун пек йышӑнӑва Сергей Артамонов премьер-министр кӑрлач уйӑхӗн 23-мӗшӗнче алӑ пуснӑ.
Укҫана Чӑваш Республикин Вӗренӳ институтне уйӑрса парӗҫ. Вӑл тупрана «Социаллӑ архитектура тата политика управленийӗ» программа валли тӑкаклӗҫ.
Патшалӑх службинче ӗҫлекенсене вӗрентсе кӑларма тата вӗсен квалификацине ӳстерме ҫав шутран 7 миллион тенкӗ уйӑрӗҫ, муниципалитетсенче тӑрӑшакансене вӗрентме — 4,5 миллиона яхӑн тенкӗ.
ЧР ял хуҫалӑх министрӗн ҫумне Ленар Балтаева ӗҫрен кӑларнӑ. Хушӑва Сергей Артамонов премьер-министр алӑ пуснӑ.
Ку дожноҫре вӑл пӗлтӗрхи ака уйӑхӗнченпе ӗҫленӗ. Унччен Мари Элте патшалӑх службин тытӑмӗнче вӑй хунӑ.
Халӗ ял хуҫалӑх министрӗн Андрей Макушевӑн икӗ ҫум юлнӑ: Инна Волкова тата Ольга Кудрявцева.
Чӑваш Ен Элтеперӗн Администрацийӗнче ӗҫлекенсен йышӗ кӑҫал 202 ҫынна ҫитнӗ.
«Правда ПФО» тӗнче тетелӗнчи хаҫатра хыпарланӑ тӑрӑх, Олег Николаев республикӑна ертсе пынӑ вӑхӑтра администарцире ӗҫлекенсен йышӗ икӗ хута яхӑн ӳснӗ. 2020 ҫулта Элтепер аппаратӗнче 110 ҫун шутланса тӑнӑ пулсан, 2026 ҫулта ку йыш 202 ҫынпа танлашнӑ. Унсӑр пуҫне «патшалӑхӑн ытти ыйтӑвне» татса паракан тепӗр 9 ҫын пур-мӗн.
ЧР промышленноҫ министрӗн ҫумӗ Евгений Теллин ӗҫрен кайнӑ. Хушӑва Сергей Артамонов премьер-министр алӑ пуснӑ.
Вӑл ку должноҫре ҫур ҫул ытла кӑна ӗҫленӗ – пӗлтӗр ҫӗртмен 6-мӗшӗнче министр ҫумӗ пулса тӑнӑ. Унччен «Чӑваш Республикинчи промышленноҫ тата инвестици ӗҫӗн аталанӑвӗн фончӗн» ертӳҫи пулнӑ. «Чеб.ру» пӗлтернӗ тӑрӑх, вӑл ҫав должноҫех таврӑнма пултарать.
Халӗ промышленноҫ министрӗн Марат Якушевӑн пӗр ҫум юлнӑ: Дмитрий Гринев.
Шупашкарта мобильлӗ интернет хӑҫан пуласси паллӑ мар. Ӗнер ЧР Цифра министерстви ку ыйтупа брифинг ирттернӗ.
Унта каланӑ тӑрӑх, мобильлӗ интернета ҫынсене хӑрушсӑрлахпа тивӗҫтерес тесе чарнӑ, ҫакна федераци шайӗнче йышӑннӑ: ӑна министерство та, ҫыхӑну операторӗсем те витӗм кӳреймеҫҫӗ.
Хальхи вӑхӑтра килти пралук интернечӗ тата Wi-Fi, корпоратив тата правительство сечӗсем, общество вырӑнӗнчи Wi-Fi ӗҫлеҫҫӗ. Кунсӑр пуҫне «шурӑ списокри» сервиссене кӗме пулать. Брифингра каланӑ тарӑх, списока пысӑклатма шантарнӑ. Шупашкарта общество вырӑнӗсенчи Wi-Fi сечӗсене те анлӑлатма планланӑ.
Ку ыйтупа хӗрӳ лини ӗҫлет: 8 (8352) 56-53-32.
Кӑрлач уйахӗн 8-мӗшӗнче Шупашкар округӗнчи Янӑш ялӗнче 2010-2020 ҫулсенче ЧР Элтеперӗ пулнӑ Михаил Игантьева асӑнса волейбол турнирӗ иртнӗ.
Пурӑннӑ пулсан Михаил Васильевич ҫак кун 64 ҫул тултармаллаччӗ. Турнира офциаллӑ майпа уҫнӑ ҫӗре унӑн мӑшӑрӗ Лариса Юрьевна, ывӑлӗ Иван, Шупашкар округӗн пуҫлӑхӗ Владимир Михайлов, ҫывӑх тусӗсем, хальхи тата унчченхи депутатсем хутшӑннӑ.
Пӗрремӗш вырӑна «Итмар» команда тухнӑ. Кӗмӗл медале «Спартак» команда тивӗҫнӗ. Виҫҫӗмӗш вырӑна вара «Инвал» команда йышӑннӑ.
Раштав уйӑхӗн 27-мӗшӗнче Владимир Пахомов пурнӑҫран уйрӑлса кайнӑ.
Вӑл Краснодар тӑрӑхӗнчи Белая Глина ялта 1946 ҫулхи юпа уйӑхӗн 25-мӗшӗнче ҫуралнӑ. 1973 ҫулта Ростоври чукун ҫул транспорчӗн институтӗнчен вӗренсе тухнӑ хыҫҫӑн Саранскри пӑравус юсакан заводра ултӑ ҫул ӗҫленӗ.
1979-1988 ҫулсенче Улатӑрти механика заводне ертсе пынӑ, кайран ӑна Улатӑр КПСС хула комитетӗнче малтан иккӗмӗш, унтан пӗрремӗш секретарь пулса ӗҫлеме шаннӑ.
1991-1996 ҫулсенче вӑл каллех Улатӑрти механика заводне ӗҫлеме куҫнӑ, унта директорӑн ҫумӗ пулнӑ, 1996-2000-мӗш ҫулсенче музыка инструменчӗсен «Альба» фирмӑн директорӗнче тӑрӑшнӑ.
2001-2004 ҫулсенче Улатӑр хулин хӑйтытӑмлӑхӗн пуҫлӑхӗ пулнӑ.
+0.3 °C