Куславкка муниципаллӑ округӗнче пурӑнакан пӗр хӗрарӑм ҫухалнӑ. Ольга Максимова (Федотова) асӑннӑ тӑрӑхри Чулкаҫ ялӗнче пурӑннӑ. Ӑна ҫывӑх ҫыннисем ҫухатнӑ. 46 ҫулти хӗрарӑм ӑҫтине вӗсем раштав уйӑхӗн 13-мӗшӗнченпе пӗлмен.
Хӗрарӑма «Лиза Алерт» хастарӗсем те шыранӑ. Паян вара вӗсем хӗрарӑм виллине тупнине, ҫывӑх ҫыннисемпе пӗрле хурланнине пӗлтернӗ.
Патӑрьелти пульницӑн инфекци уйрӑмне тӗплӗ юсав хыҫҫӑн уҫнӑ. Халӗ унта йӑлтах ҫӗнӗ те таса.
Пандеми вӑхӑтӗнче ҫак уйрӑм ковид-госпиталь пек ӗҫленӗ. Унта 20 пациент валли вырӑн пулнӑ. Кӑҫал ҫулла вӗҫӗнче инфекци уйрӑмне тӗплӗ юсама тытӑннӑ.
Пӗр хутлӑ ҫуртӑн фасадне, тӑррине, алӑкӗсене, чӳречисене, коммуникаци тытӑмне тата сантехникӑна улӑштарнӑ. Ҫак ӗҫсене «Строймашсервис» 16,9 миллион тенкӗпе пурнӑҫланӑ.
Шупашкарта васкавлӑ пулӑшура ӗҫлекен тухтӑрсем чӗри тапма чарӑннӑ ҫынна вилӗмрен ҫӑлса хӑварнӑ.
Раштав уйӑхӗн 18-мӗшӗнче шурӑ халатлисем 45 ҫулти арҫын патне кайнӑ. Вӑл йывӑррӑн сывланӑ, унӑн тути кӑвакарса кайнӑ. Тухтӑрсем пырса ҫитсе ӑна пулӑшма тытӑннӑ вӑхӑтра арҫын тӑнне ҫухатнӑ, сывлама пӑрахнӑ.
Маргарита Давыдова тухтӑрпа Екатерина Баринова фельдшер парӑнман. Вӗсем чӗрепе ӳпке реанимацийӗ ирттерме йышӑннӑ. Тепӗр 10 минутран арҫыннӑн чӗри ӗҫлесе кайнӑ.
Кайран ӑна пульницӑна илсе кайнӑ. Халӗ вӑл унта сипленет.
Республикӑра ОРВИпе чирлекен нумайланнӑ. Ытларахӑшӗ – ачасем. Кун пирки Роспотребнадзор пӗлтерет.
Иртнӗ эрнере республикӑра 151 ҫын гриппа чирленине палӑртнӑ. Вӗсенчен 51-шӗ- аслӑ ӳсӗмри ҫынсем, 100-шӗ – 17 ҫул тултарманнисем. Ведомство палӑртна тӑрӑх, ӳпке шыҫҫипе те чирлекен нумай. Ҫавна май Шупашкарти пӗр шкул дистанци мелӗпе вӗренет. Республикӑри тӗрлӗ округри 37 шкулти 1-5 класс дистанци мелӗ ҫине куҫнӑ.
| РАШ | 19 |
Ӗнер, раштав уйӑхӗн 18-мӗшӗнче, «Атӑл» автомобиль ҫулӗ ҫинчи инкекре виҫҫӗн аманнӑ.
Ирхи 4 сехет те 30 минутра пулса иртнӗ инкекре «Киа Рио» машина водителӗ хирӗҫ килекен ҫул ҫине тухса кайса «КамАЗ» фурӑпа ҫапӑннӑ.
Иномарка рулӗ умӗнчи 57 ҫулти водителе больницӑна илсе кайнӑ, ҫывӑх вӑхӑтра вӑл унта сыватӗҫ. Машинӑри икӗ пассажир килте сипленӗҫ.
Елчӗк тӑрӑхӗнчи пӗр ял хуҫалӑх предприятийӗнче рабочи погрузчик айне пулса вилнӗ.
Инкек кӑҫалхи авӑн уйӑхӗн 13-мӗшӗнче 15 сехетре «Труд» ял хуҫалӑх кооперативӗнче пулса иртнӗ. Шар курни инкек вырӑнӗнчех куҫне ӗмӗрлӗхе хупнӑ. Шар кураканни — 34 ҫулти механизатор.
Пӑтӑрах хыҫҫӑ РФ Следстви комитечӗн тӗпчевҫисем РФ Пуҫиле кодексӗн 143-мӗш статйин 2-мӗш пайӗпе пуҫиле ӗҫ пуҫарнӑ. Тӗпчевҫӗсем шухӑшланӑ тӑрӑх, пӑтӑрмахшӑн ӗҫ сыхлавӗн инженерӗ яваплӑ. Вӑл мехаизаторӑн погрузчикпа ӗҫлеме ирӗк ҫуккине пӗлсе тӑрсах ӑна ҫав ӗҫе шанса панӑ.
Кӑҫалхи 10 уйӑхра Чӑваш Енре 12 пин ытла ҫын вилнӗ. Тата тӗрӗсрех каласан, 12 095 ҫын. Ку вӑл пӗлтӗрхи ҫав тапхӑртинчен 7,2 процент сахалрах.
Ҫав вӑхӑтрах ҫуралакансен шучӗ те чакнӑ. Пурӗ 4,5 процент. Пӗлтӗрхи 10 уйӑхра ҫут тӗнчене 8 358 ҫӗнӗ кайӑк килнӗ пулсан, кӑҫал — 7 981.
Вилекенсен шучӗ ҫуралакансенчен 1,5 хут пысӑкрах.
Ҫемье ҫавӑракансен йышӗ 0,7 чакнӑ, уйрӑлакансен — на 6,3 процент.
Чӑваш Енре пилӗк ҫулта 400 яхӑн земство тухтӑрӗпе фельдшерӗ ӗҫлеме пуҫланӑ. ЧР сывлӑх сыхлавӗн министрӗ Владимир Степанов пӗлтернӗ тӑрӑх, «Земство тухтӑрӗ» тата «Земство фельдшерӗ» программӑсемпе килӗшӳллӗн республикӑри ял-салари пульницӑсене 250 ытла тухтӑр тата 130 фельдшер ӗҫлеме кайнӑ.
Земство тухтӑрӗсем 1 миллион тенке тивӗҫеҫҫӗ, земство фельдшерӗсем вара – 500 пин тенке. Иртнӗ эрнере РФ Президенчӗ Владимир Путин ҫак хисепсене икӗ хут пысӑклатма сӗннӗ, анчах – Раҫҫейри ҫӗнӗ регионсенче кӑна.
Вӑрнар муниципаллӑ округӗнче икӗ фельдшерпа акушер пункчӗ уҫӑлнӑ. Услапа тата Кӑкшӑм ялӗсенче пурӑнакансем ҫакна тахҫантанпах кӗтнӗ.
Услапасен райцентра ҫитме 25 ҫухрӑм парӑнтармалла, кӑкшӑмсен вара - 23 ҫухрӑм. Ялта ФАП пулни питӗ меллӗ. Ҫак икӗ медпунктра 900 ытла ҫын медпулӑшу илӗ.
Условисем вара питӗ хӑтлӑ. Кӑкшӑмсем ФАПшӑн кӑна мар, унта ӗҫлекен Светлана Ильиничнӑшӑн та савӑнаҫҫӗ. Вӑл унта 30 ҫул вӑй хурать. Малашне фельдшер пациентсене хӑтлӑ пӳлӗмсенче йышӑнӗ.
Ҫӗнӗ Шупашкарти шӑл тухтӑрӗсем «Айболит тухтӑрӑн стоматологийӗ» ачасене ҫӗнӗ кӗнекепе паллаштарнӑ.
Кӑларӑма Людмила Исаева поэт пулӑшнипе хатӗрленӗ. Унра Ҫӗнӗ Шупашкарти ӳнер шкулӗн вӗренекенӗсен ӳкерчӗкӗсемпе илемлетнӗ. Кӗнекене «Шӑла пӗчӗкрен упра» проектпа килӗшӳллӗн кун ҫути кӑтартнӑ.
«Айболит тухтӑрӑн стоматологийӗ» кӗнекепе паллашсан ачасем шӑл тухтӑрӗсенчен хӑрама пӑрахӗҫ тесе шухӑшлаҫҫӗ.
-9.7 °C