Канашлу вӑхӑтӗнче ҫынна тапӑннӑшӑн Шӑмӑршӑ округӗн пуҫлӑхӗ Сергей Галкин судра явап тытнӑ.
Аса илтеретпӗр: 2025 ҫулхи пушӑн 22-мӗшӗнче Шӑмӑршӑ округӗнче сунар сезонне уҫассипе ҫыхӑннӑ канашлура Сергей Галкин 70-ти сунарҫа тапӑннӑ, киревсӗр сӑмахсемпе кӳрентерме пуҫланӑ. Ҫапла сӑмах ҫине сӑмах – алӑсем те хута кайнӑ, пуҫлӑх сунарҫа ҫапнӑ. Суд вӑл унӑн сывлӑхне ҫӑмӑл сиен кӳнӗ тесе йышӑннӑ.
Приговорпа килӗшӳллӗн, Сергей Галкинӑн 25 пин тенкӗ штраф тӳлемелле. Ҫавӑн пекех суд сунарҫӑн граждан тавӑҫне те тивӗҫтернӗ.
Канаш округӗнче прокуратура ятарлӑ ҫар операцийӗнче вилнӗ салтакшӑн патшалӑх паракан тӳлеве тӑванӗсене памалла тунӑ.
Укҫана вара малтан ют хӗрарӑм хапсӑннӑ. Вӑл салтакпа РФ Хӳтӗлев министерствипе килӗшӳ тунӑ кун паллашнӑ. Вӗсем ҫав кунах пӗрлешнӗ. Анчах пӗрле пурӑнман, пӗр хуҫалӑх тытса пыман. Ҫак хӗрарӑма салтакӑн тӑванӗсем те палламан. Салтак ятарлӑ ҫар операцийӗнче пулнӑ чухне хӗрарӑм унпа ҫыхӑну тытман.
Темиҫе уйӑхран арҫын хыпарсӑр ҫухалнӑ, вӑхӑт иртсен суд вӑл вилнӗ тесе йышӑннӑ. Кун хыҫҫӑн «арӑмӗ» патшалӑх паракан тӳлеве илме тесе тӑнӑ. Анчах май килмен: суд вӗсем суя майпа пӗрлешнӗ тесе йышӑннӑ.
Вӑрмар округӗнчи хӗрарӑм харпӑр клиникӑра ФГДС тунӑ хыҫҫӑн вилнӗ.
Ку 2022 ҫулта пулнӑ. Хӗрарӑм ҫак процедурӑна тума Шупашкарти медцентра кайнӑ.
Тухтӑр тӗрӗслев вӑхӑтӗнче пациенткӑн шалти органне сиенлетнӗ. Анчах медпулӑшу паман, ҫавӑн пекех киле янӑ. Темиҫе кунран хӗрарӑм больницӑра вилнӗ.
ФГДС тунӑ тухтӑра тӗрмене хупмасӑр 2 ҫуллӑха айӑпланӑ. Клиникӑран вара 2 миллион тенкӗ шыраса илнӗ.
Анчах вилнӗ хӗрарӑмӑн тӑванӗсем приговорпа килӗшмен – Аслӑ суда апелляци панӑ. Кун хыҫҫӑн приговора улӑштарнӑ: тухтӑра 1,5 ҫуллӑха ирӗкрен хӑтарнӑ.
Ӗнине таптаса кайнӑ, машина хуҫине вара куншӑн 1 миллион тенкӗ тӳлемелле. Ҫавӑн пек лару-тӑрӑва лекнӗ Пӑрачкав округӗнчи хӗрарӑм.
Авари «Йӗпреҫ – Березовка – Кудеиха» ҫул ҫинче каҫхине пулнӑ. Ӗне «Киа» машина айне пулса вилнӗ. Машина вара самай сиенленнӗ. Экспертиза тунӑ та – тӑкак 2 млн та 867,7 пин тенкӗпе танлашнӑ. Машинӑн пасарти хакӗ – 3,7 млн тенкӗ.
Суд ҫапла йышӑну тунӑ: хӗрарӑмӑн машина хуҫине 1 млн та 33,9 пин тенкӗ тӳлемелле.
Етӗрнере улма-ҫырла сутуҫин ачасене зеленкӑпа ҫӑвӑнтарнӑшӑн явап тыттарнӑ. Суд ӑна 2,5 ҫуллӑха ҫирӗп режимлӑ колоние ӑсатма йышӑннӑ.
Ку пӑтӑрмах кӑҫал утӑ уйӑхӗн 30-мӗшӗнче пулнӑ. Суту-илӳ вырӑнӗ тытса тӑракан арҫын хӑйӗн патӗнче ӗҫлекен сутуҫӑран ҫакна пӗлнӗ: 12-ри тата 13-ри ачасем сентре ҫинчен мандарин вӑрлама хӑтланнӑ иккен. Арҫын вӗсене вӗрентме шухӑшланӑ: ачасене хӑйӗн машинине лартнӑ та вӑрмана илсе кайнӑ, унта ачасене питне зеленкӑпа ҫума хушнӑ. Ҫакна арҫыннӑн хӗрӗ телефон ҫине ӳкернӗ. Кайран вӗсем ачасене ҫавӑнтах хӑварса хӑйсем таврӑннӑ. Пӗртӑвансен каялла хӑйсен тӗллӗн таврӑнма тивнӗ.
Арҫынна 2 эрнерен кӑна тытса чарнӑ. Ҫав вӑхӑт тӗлне вӑл республикӑран кайма ӗлкӗрнӗ. Ҫакна та палӑртмалла: суд унран ачасем валли 440 пин тенкӗ шыраса илме те йышӑннӑ.
Етӗрне районӗнчи пӗр ялта пурӑнакан арҫынран коллекторсем укҫа тавӑрса пама тапӑннӑ. Вӑл вара ҫав вӑхӑтра салтакра пулнӑ, кивҫен укҫа паракан нимле организацирен те укҫа илмен. Арҫын пулӑшу ыйтса прокуратурӑна ҫул тытнӑ.
Надзор органӗ тӗрӗсленӗ те 2023 ҫулхи утӑ уйӑхӗнче ҫав ҫын ячӗпе икӗ микрофинанс организацийӗнче 22 пин тенкӗ ют ҫын укҫа илнине палӑртнӑ. Укҫана илме арҫыннӑн паспорт даннӑйӗпе тата кивӗ абонент номерӗпе усӑ курнӑ.
Ҫавна май йӗрке хуралҫисем улталакансем тӗлӗшпе пуҫиле ӗҫ пуҫарнӑ, арҫынна кӑмӑл-сипет тӗлӗшӗнчен шар кӑтартнӑшӑн кредит организацине укҫа тӳлеттерме ыйтса суда тавӑҫпа тухнӑ. Суд прокуратура ыйтнине тивӗҫтернӗ.
Чӑваш Енри 61 ҫулти хӗрарӑм пӗлӗшне вӗлернӗшӗн ҫирӗп режимлӑ колонире 8 ҫул ҫурӑ ларӗ.
Ку инкек Куславккара ҫурла уйӑхӗнче пулса иртнӗ. Вӑл килӗнче тӑванӗпе, арҫынпа, хирӗҫсе кайнӑ та ӑна пуртӑпа темиҫе хутчен ҫапнӑ. Лешӗ ҫавӑнтах вилнӗ.
Нумаях пулмасть ун тӗлӗшпе пуҫарнӑ пуҫиле ӗҫе суд пӑхса тухнӑ.
Шупашкар районӗнчи пӗр ялта пурӑнакан арҫын ӳсӗрле руль умне ларма юратнӑшӑн машинӑсӑр тӑрса юлнӑ.
Вӑл темиҫе хутчен те ӳсӗр пуҫпа машинӑпа ҫула тухнӑ. 2023 ҫулхи кӑрлач уйӑхӗнче ӑна ҫавӑншӑн пӗрре явап тыттарнӑ-ха. Кӑҫалхи авӑн уйӑхӗн 14-мӗшӗнче вӑл каллех ӗҫнӗ пуҫпа ҫула тухнӑ. «Ниссан Альмера» автомашинӑна йӗрке хуралҫисем Ишлей патӗнче чарнӑ, водитель эрех ӗҫнипе ӗҫменнине тӗрӗслеме килӗшмен.
64 ҫулти арҫынна халӗ суд 6 уйӑх ӗҫлеттерсе юсантарма, тупӑшӑн 5 процентне патшалӑха тытса юлма йышӑннӑ. Унсӑр пуҫне машинӑна патшалӑх валли конфискациленӗ.
Вӑрмар районӗнчи Аслӑ Пинер ялӗнче пурӑнакан арҫын тӗлӗнсе каймалла кӗвӗҫ чунлӑ пулнӑ.
Кӑҫалхи ҫӗртме уйӑхӗн 9-мӗшӗнче каҫхине 40-ри арҫын хӑй килӗштерекен хӗрарӑмӑн ашшӗ-амӑшӗн килӗ умӗнче хайхи унчченхи упӑшкипе хирӗҫсе кайнӑ. Ӑна вӑл пӑрӑҫлӑ баллонран сирпӗтнӗ. Сӑмах май каласан, унччен вӑл хӗрарӑма хӗненӗ, ӑна уншӑн административлӑ майпа явап тыттарнӑ.
Хальхинче арҫынна суд 7 пин тенкӗ штраф тӳлеттермелле тунӑ.
Ҫӗрпӳ округӗнчи хӗрарӑм сывлӑхӗ хавшасан ӑрӑмҫӑ патне кайнӑ та шар курнӑ, аяк пӗрчине хуҫнӑ. Кайран вӑл ҫав ӑрӑмҫӑран суд урлӑ 100 пин тенкӗ шыраса илнӗ.
Ку 2024 ҫулхи ҫурла уйӑхӗнче пулнӑ. Сеансра ӑрӑмҫӑ унӑн ҫурӑмӗ тӑрӑх утма, аякран аяк ҫине ҫавӑрма тытӑннӑ. Хӗрарӑм темӗн ыратнине туйсан чарӑнма ыйтнӑ. Унтан сеансшӑн укҫа тӳленӗ те тухса кайнӑ.
Каярахпа пульницӑра вӑл аяк пӗрчи хуҫӑлнине пӗлнӗ. Судра ӑрӑмҫӑ айӑпне йышӑнман. Ҫапах суд хӗрарӑм енче пулнӑ.
+9.3 °C