Ҫӗнӗ Шупашкарта пурӑнакан 32-ри арҫын ятарлӑ ҫар операцине хутшӑнакан салтак карточкин дубликатне туса унтан 2 млн тенкӗ вӑрланӑ.
Унӑн куншӑн пӗтӗмӗшле режимлӑ юсанмалли колонире 3 ҫул ҫурӑ ларма тивӗ. Ҫапла йышӑннӑ суд.
Суд палӑртнӑ тӑрӑх, кӑҫал кӑрлачра вӑл ятарлӑ ҫар операцине кайма контракт ҫырнӑ арҫынпа паллашнӑ. Ӑна ӗҫ укҫи валли банк карттине тума пулӑшнӑ. Ҫавӑн чухне вӑл хӑйӗн валли карточкӑн дубликатне те туса ӗлкӗрнӗ.
Салтак ятарлӑ ҫар операцине кайсан карточка ҫине унӑн шалӑвӗ килме тытӑннӑ. Ҫак арҫын дубликатпа усӑ курса унти 2 млн ытла тенке илнӗ те хӑй пӗлнӗ пек усӑ курнӑ, парӑмӗсене татнӑ.
Салтака кӳнӗ тӑкака арҫын саплаштарман-ха.
Етӗрне округӗнчи арҫын ятарлӑ ҫар операцийӗнче вилнӗ салтакӑн картти ҫинчи 6 миллион тенке илсе хӑйӗн валли моторпа кимӗ туяннӑ, машина кредитне татнӑ. Анчах савӑнӑҫ нумая пыман — куншӑн унӑн судра явап тытма тивнӗ.
Ӗҫ-пуҫ акӑ мӗнлерех пулса иртнӗ: вилнӗ салтакӑн амӑшӗ еткерлӗхе хӑйӗн ҫине тунӑ чухне ывӑлӗн картти ҫинчи укҫа ҫуккине асӑрханӑ. Кайран вӑл ывӑлӗн пӗлӗшӗнче пулни ҫиеле тухнӑ — салтак отпуска килсен ӑна парса хӑварнӑ иккен.
Салтак вилсен вара пӗлӗшӗ картта унра пулнине ҫемйине пӗр сӑмах та шарламан. 2024 ҫулхи авӑн-раштав уйӑхӗсенче вӑл унти укҫана пӗчӗкшерӗн илсе пынӑ.
Арҫын пуҫиле ӗҫ пуҫарсанах салтак амӑшне пӗтӗм тӑкака саплаштарнӑ. Ҫапах суд ӑна 3 ҫуллӑха тӗрмене хупмасӑр айӑплнӑ, 50 пин тенкӗ штраф тӳлеттерме йышӑннӑ. Прокуратура ыйтнипе моторпа кимме патшалӑх валли туртса илнӗ. Ҫапах прокуратура приговор ытлашши ҫемҫе тесе шухӑшлать, машинӑна та конфискацилеме тавӑҫ тӑратнӑ. Ара, кредитне арҫын вӑрланӑ укҫапа тӳлесе татнӑ вӗт.
Патӑрьел округӗнче арҫын арӑмне сӑнчӑрта тытнӑшӑн судра явап тытнӑ.
Суд палӑртнӑ тӑрӑх, 46-ри упӑшки арӑмне эрех ӗҫме ярас мар тесе ӑна кӑҫал сахалтан та икӗ хутчен сӑнчӑрпа кӑкарса лартнӑ: акан 15-мӗшӗнче тата ҫӗртмен 9-мӗшӗнче. Ҫапла хӗрарӑм 3 тата 8 сехет ларнӑ, ҫав вӑхӑтра упӑшки ӗҫре пулнӑ. Кун пирки арӑмӗ полицие кайса пӗлтернӗ. Кунсӑр пуҫне ҫакӑ паллӑ: ака уйӑхӗнче упӑшки арӑмне эрех ӗҫме чарӑнмасан вӗлерессипе хӑратнӑ.
Судра вара арӑмӗ упӑшкине ытлашши ҫирӗп явап тыттарма ыйтман. Ара, ҫав вӑхӑталла вӗсем мирлешнӗ. Суд приговор вуланӑ: арҫыннӑн ирӗкне 1 ҫуллӑха чикӗлеме йышӑннӑ.
Чӑваш Енри пӗр предприяти пуҫлӑхӗ хыснана налук тӳлесе ҫитермен. Ку ӗҫпе РФ Следстви комитечӗн Чӑваш Енри управленийӗн тӗпчевҫисем тӗрӗслев пуҫарнӑ.
2020 ҫулхи кӑрлач уйӑхӗнчен пуҫласа 2023 ҫулхи пуш уйӑхӗччен арҫын тупӑшран тата хушма хакран илекен налука хыснана тӳлесе ҫитермен. Пурӗ 212 миллион тенкӗ ытла. Предприяти ҫирӗплетмелли тӗрлӗ хатӗр-хӗтӗр тата инструмент курттӑммӑн сутса пурӑнать иккен. Налук сахалрах тӳлес тесе декларацире суя цифрӑсем кӑтартнӑ.
Халӗ арҫын мӗнпур парӑма ҫеҫ мар, штрафпа пение те, пурӗ 314 миллион тенкӗ, тӳлесе татнӑ.
Пӑрачкаври хӗрарӑм йытӑ ҫурине путарса вӗлернӗшӗн суд сакки ҫинче явап тытнӑ. Ӑна тӗрмене хупмасӑр 3 ҫуллӑха айӑпланӑ.
Ку пуш уйӑхӗн 13-мӗшӗнче Пӑрачкавра пулнӑ. Хӗрарӑм килти икӗ йытӑ ҫурине, икӗ уйӑхрискерсене, миххе чикнӗ те Сӑр юханшывӗ патне вӗсене путарма кайнӑ. Ҫакна 13 ҫулти икӗ арҫын ача курнӑ, вӗсем хӗрарӑма йытӑ ҫурисене пама ыйтнӑ. Анчах лешӗ чӗрчунсене шыва ывӑтнӑ.
Арҫын ачасенчен пӗри пушмакне хывса, шӑлавар пӗҫҫине тавӑрса пӑрлӑ шыва кӗнӗ. Анчах вӑл пӗр йытӑ ҫурине кӑна ҫӑлса ӗлкӗрнӗ, тепри вилнӗ.
Хӗрарӑм судра айӑпне йышӑннӑ.
Улатӑрта пурӑнакан пӗр хӗрарӑм пасарта маркӑламан атӑ-пушмак сутнӑ. Ҫавна Роспотребнадор ӗҫченӗсем тупса палӑртнӑ.
Уйрӑм усламҫӑ маркӑламан 15 мӑшӑр пушмак тата тавар ҫаврӑнӑшӗн мониторингне кӗртмен 4 мӑшӑр пушмак сутнӑ.
Кӑлтӑк тӗлӗшпе надзор органӗн ӗҫченӗсем административлӑ ӗҫ пуҫарнӑ, саккунсӑр продукцие туртса илӗ.
Суд Роспотребнадзорпа килӗшнӗ, усламҫӑ-хӗрарӑма административлӑ майпа явап тыттарма, таварне конфискацилеме йышӑну кӑларнӑ.
Усламҫӑ Таможня союзӗн техника регламентне пӑхӑнманнине те, потребительсене хӳтӗлесси ҫинчен калакан саккуна тата Тавар сутмалли правилӑна пӑснине те тупса палӑртнӑ. Уншӑн та ӑна административлӑ майпа явап тыттарнӑ.
Чӑваш Енри ачасен правине хӳтӗлекен уполномоченнӑй тата Чӑваш Енри профессионал медиаторсен ассоциацийӗ килӗштерсе ӗҫлесси ҫинчен калакан килӗшӗве алӑ пуснӑ.
Документа ачасен хӳтӗлевҫи Алевтина Федорова тата ассоциаци президенчӗ Екатерина Саламатова алӑ пусса ҫирӗплетнӗ.
Медиатор тӗллевӗ — тавлашуллӑ ыйтӑва суда ҫитмесӗр, калаҫса татӑлса, пӗр-пӗрин шухӑшне шута илсе тата тӗпе хурса татса пама вӗрентесси.
Ҫемьере ӑнланманлӑх сиксе тухсан та калаҫса татӑлнине нимӗн те ҫитмест. Шӑпах ҫав ыйтупа ӗҫлӗҫ те профессилле медиаторсем. Ҫак йӗркесен авторӗ пӗлнӗ тӑрӑх, ассоциаци прездиденчӗ чылай ҫул юристра ӗҫленӗ, унӑн психологи пӗлӗвӗ те пур.
Ҫӗнӗ Шупашкарта пурӑннӑ пӗр кинемей 2023 ҫултах вилнӗ. Анчах хваттершӗн коммуналлӑ тӳлевпе парӑм пухӑнса пынӑ.
Кинемейӗн хваттерне эткерлӗхе илме тӑванӗсем пулман. Ҫавӑнпа вырӑнти управляющи компани парӑма хула администрацийӗнчен шыраса илме тавӑҫпа суда тухнӑ.
Хваттерӗн хуҫа ҫуккине кура вӑл муниципалитет харпӑрлӑхне куҫать, апла пулсан парӑма унӑнах тӳлесе татмалла — ҫапларах йышӑннӑ суд.
Йӗпреҫ округӗнчи 66 ҫулти арҫын пӗр эрнере тӑватӑ велосипед вӑрланӑ. Нумаях пулмасть суд ун тӗлӗшпе приговор вуланӑ.
Вӑл кӑҫалхи ҫӗртме уйӑхӗн 9-мӗшӗнче Йӗпреҫри лавкка умӗнче велосипед тӑнине асӑрханӑ, тытнӑ та ӑна илсе ларса кайнӑ. Ку кӑна мар, ҫӗртмен 15-мӗшӗччен вӑл тепӗр виҫӗ велосипед вӑрланӑ.
Ҫакӑ паллӑ: арҫын судпа унччен те айӑпланнӑ. Хальхинче суд ӑна ҫирӗп режимлӑ колоние 1,6 ҫуллӑха ӑсатма йышӑннӑ. Арҫын велосипедсене хуҫисене тавӑрса панӑ.
Чӑваш Енри маршруткӑран тухса ӳкнӗшӗн 500 пин тенкӗ шыраса илнӗ. Ку пӑтӑрмах 2023 ҫулхи нарӑс уйӑхӗнче пулнӑ.
Хӗрарӑм 325-мӗш маршруткӑна ларма тӑнӑ. Анчах ҫав вӑхӑтра водитель хускалса кайнӑ, алӑка вара хупман.
Ҫавна пула хӗрарӑм маршруткӑран тухса ӳкнӗ те пӗҫӗ шӑммине хуҫнӑ. Унӑн виҫӗ больницӑра выртма тивнӗ. Кайран ӑна операци те тума тивнӗ.
Хӗрарӑм перевозчикран 1 млн тенкӗ шыраса илесшӗн пулнӑ. Анчах суд хака чакарнӑ, 500 пин тенкӗ тӳлеттерме йышӑннӑ.
-10.7 °C