Лайӑх хыпар: Чӑваш Енри 7 тухтӑр Раҫҫей шайӗнчи конкурсра палӑрнӑ
Пӗрремӗш вырӑна «Чи лайӑх терапевт» номинацире — ЧР сывлӑх сыхлавӗн ҫӗнӗ министрӗ Лариса Тарасова, «Чи лайӑх хирург» номинацире Валентин Ворончихин мала тухнӑ.
Иккӗмӗш вырӑна анестезиолог-реаниматологсенчен — Дмитрий Лукоянов, стоматологсенчен — Любовь Гаврилова, виҫҫӗмӗш вырӑна травматолог-ортопедсенчен Юрий Лемаев йышӑннӑ.
Республикӑри онкодиспансерӑн тӗп тухтӑрӗпе Светлана Орловӑпа унӑн ҫумӗ Сергей Алексеев вара ятарлӑ премие тивӗҫ пулнӑ
Чӑваш патшалӑх пукане театрӗн режиссёрӗ Раҫҫей Правительствин премине тивӗҫнӗ. Вӑл — культурӑпа ӳнер енӗпе пултаруллӑ 43 лауреат йышӗнче.
Денис Андронов — ҫамрӑк та пултаруллӑ режиссёр. Режиссер-постановщикра вӑл 2021 ҫулта ӗҫлеме тытӑннӑ та 2024 ҫулта тӗп режиссёр пулса тӑнӑ.
Унӑн пӗрремӗш ӗҫӗ — «Хранители» патриот спектаклӗ. Ӑна вӑл Тӑван ҫӗршывӑн аслӑ вӑрҫи вӑхӑтӗнче тылра ӗҫленисене халалланӑ.
Денис Андронов ҫулталӑкра пурӗ 240 пин тенкӗ премие тивӗҫӗ.
Пирӗн республикӑри авторсен коллективӗ культура тытӑмӗнче премие тивӗҫнӗ. Ӑна Михаил Мишустин премьер-министр аллинчен ЧР культура министрӗ Светлана Каликова тивӗҫнӗ.
Унпа пӗрле Чӑваш наци музейӗн директорӗ Ирина Меньшикова премие илнӗ. Вӗсем ӑна «Раҫҫейӗн тӗрленӗ картти» проекта пурнӑҫланӑшӑн тивӗҫнӗ.
Палӑртмалла: пӗтӗмпе 7 проект пурнӑҫланӑ 16 ҫын преми илнӗ. Унӑн пӗтӗмӗшле виҫи – 1 миллион тенкӗ.
Красноармейски районӗнчи культура ҫуртӗнче Нестер Янкас ячӗллӗ культура, ӳнер тата литература пӗрлӗхӗн 35 ҫулхине уявлама пухӑннӑ. Мероприяти раштав уйӑхен 24-мӗшӗнче иртнӗ.
Ҫав кун пӗрлӗхӗн преми лауреачӗсене те чысланӑ.
Ҫак ҫулсенче ку хисепе 100 ытла ҫын тивӗҫнӗ. Кӑҫалхисен йышӗнче «Ял пурнӑҫӗ» район хаҫачӗ те пур иккен.
Нестер Янкас ячӗллӗ пӗрлӗх 2024 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. Кӑҫал ҫак ӗҫ 2024 ҫулхи раштав уйӑхӗн 22-мӗшӗччен пырать, мӗншӗн тесен Трак енре асӑннӑ пӗрлӗх йӗркеленнӗренпе шӑп 35 ҫул ҫитет. Уяв ячӗпе ҫак кун Культура ҫуртӗнче лауреатсен пысӑк концерчӗ пулать тата ҫӗнӗ лауреатсене чыслаҫҫӗ.
Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти литература ӗҫӗсемпе савӑнтарнӑ, хавхалантарнӑ ентешӗмӗрсем хутшӑнасса шанатпӑр эпир.
Пулас лауреатсен ӗҫ-хӗлне коллективсенче тишкерсе тухмалла, документсене тӑратса Нестер Янкас ячӗллӗ пӗрлӗх правленийӗн (канашӗн) ларӑвӗнче пӑхса тухса пӗтӗмлетмелле, ӑна Нестер Янкас ячӗллӗ пӗрлӗхӗн наградӑсем паракан комиссин пӑхса тухса ҫирӗплетмелле.
Мария Мамаева куҫ курманнисен хушшинче иртнӗ Раҫҫей чемпионатӗнче ылтӑн медаль илнӗшӗн премие тивӗҫнӗ. Ӑна республика хыснинчен парӗҫ, хушӑва ЧР Элтеперӗ Олег Николаев алӑ пуснӑ.
Премие спортсменкӑна пӗр хутчен парӗҫ. Вӑл 12 пин тенкӗпе танлашать.
Аса илтерер: чемпионат ака уйӑхӗн 6-11-мӗшӗсенче Калугӑра иртнӗ. 17 ҫулти Мария Мамаева унта ылтӑн медальсӗр пуҫне кӗмӗл тата пӑхӑр медальсем ҫӗнсе илнӗ. Ҫӗртме уйӑхӗнче вара вӑл Раҫҫей Кубокӗнче ишессинче ӑмӑртса икӗ ылтӑн, икӗ кӗмӗл тата пӗр пӑхӑр медальсем ҫӗнсе илнӗ.
Чӑваш Республикин Патшалӑх премине, 75 пин тенке, камсем тивӗҫни паллӑ. Хушӑва ЧР Элтеперӗ Олег Николаев алӑ пуснӑ.
Литература тата ӳнер тытӑмӗнче ӑна «Сӑр чикки» опера лартнӑшӑн Питӗрти «Арт-Петербург» ыркӑмӑллӑх фончӗн президенчӗ Ирина Гаудасинская, Питӗрти патшалӑх консерваторийӗн доценчӗ Екатерина Иванова, Чӑваш патшалӑх оперӑпа балет театрӗн артисчӗ Алексей Рюмин, Карина Шебелян усламҫӑ, Питӗрти режиссер-постановщик Елисей Шепелев тивӗҫнӗ.
Гуманитари ӑслӑлӑхӗсен тытӑмӗнче премие И.Н.Ульянов ячӗллӗ ЧПУ вӗрентекенӗсем Алевтина Зыкина, Татьяна Иванова, Елена Минеева, лаборатори заведующийӗ Алексей Минеев, Урал патшалӑх университечӗн вӗрентекенӗ Алексей Старостин «Наркомнац РСФСР и реализация национальной политики в 1917-1920-е годы» монографишӗн илнӗ. Техника ӑслӑлӑхӗсен тытӑмӗнче И.Н.Ульянов ячӗллӗ ЧПУ вӗрентекенӗсем Борис Алексеев, Николай Кольцов, Владислав Федотов кинетикӑна тата хими реакцийӗсене тӗпченӗшӗн премие тивӗҫнӗ.
«Чӑваш Ен» патшалӑх телерадиокомпанийӗн журналисчӗ Алексей Енейкин 2023 ҫулшӑн ҫамрӑксен патшалӑх премине тивӗҫнӗ. Кун пирки Альбина Юрату сӑвӑҫ халӑх тетелӗнчи хӑйӗн страницинче хӑпартланса пӗлтернӗ.
Сӑмах май каласан, 2022 ҫулта Алексей Ҫемен Элкер премийӗн лауреачӗ ята тивӗҫнӗччӗ. Ун чухне журналистӑн Сӑр тата Хусан хӳтӗлев чиккисене чавма хутшӑннисене халалласа хатӗрленӗ «Военное детство» (чӑв. Ҫар ачалӑхӗ) телепрограммӑсен ярӑмне ҫавӑн пек сума суса хакланӑччӗ.
Шупашкарта «ГолосА» поэзи фестивалӗ иртӗ. Ӑна Геннадий Айхи ҫуралнӑранпа 90 ҫул ҫитнине халаллӗҫ.
Культура мероприятийӗ Чӑваш Енӗн Наци вулавӑшӗнче ҫу уйӑхӗн 23-24-мӗшӗсенче пулӗ.
Унӑн формачӗ хӑйне евӗр: музыка, вокал, тӗрлӗ хускану, живопись, сӑвӑсем, поэзире пирвайхи утӑмӗсене тӑвакансемпе тӗлпулусем.
Фестивалӗн тӗп пулӑмӗ – поэзи спектаклӗсем. Вӗсене поэтӑн хӗрӗ, актриса, режиссер, поэт, Вероника Айги хатӗрленӗ. Ӑна унӑн «Хористки» проектне (Мускав) хутшӑнакансем кӑтартӗҫ.
Ҫу уйӑхӗн 23-мӗшӗнче, 16.00–18.00 сехетсенче, «День присутствия всех и всего» музыкӑпа поэзи перформансӗ Чӑваш Енӗн Наци вулавӑшӗнче иртӗ.
19.00-20.30 сехетсенче Камера театрӗнче «Хористки» ушкӑн «Т.Ч.К.» спектакль кӑтартӗ. Режиссёрӗ – Вероника Айги.
Ҫу уйӑхӗн 24-мӗшӗнче маларах асӑннӑ вулавӑшра 14.00-15.00 сехетсенче «Поклон – пению» спектакль пулӗ. Ӑна Геннадий Айхи хайлавӗпе Вероника Айги режиссер хатӗрленӗ. Куракансем умне «Хористки» ушкӑн тухӗ. 15.00-16.00 сехетсенче «ГолосА» конкурс ҫӗнтерӳҫисене чыслӗҫ, Г. Айги ячӗллӗ преми парӗҫ.
Чӑваш Республикин литературӑпа ӳнер енӗпе патшалӑх премине илме тӑратнӑ ӗҫсенчен тӑваттӑшне конкурса хутшӑнма суйласа илнӗ.
Вӗсенчен пӗри — «Чӑваш Ен» издательствӑпа полиграфи комплексӗнчи Чӑваш Енри фотокорреспондентсен музейӗ, полиграфи музейӗ. Авторӗ — «Хыпар» издательство ҫурчӗн фотокорреспонденчӗ Сергей Журавлёв. Ӗҫе издательствӑпа полиграфи комплексӗ тӑратнӑ.
Кӗске метрлӑ «Мальчик из Шоршел» илемлӗ фильма Совет Союзӗн икӗ хут Геройне Андриян Николаева халалланӑ. Автор — Ҫӗнӗ Шупашкарти «Химик» культура ҫурчӗн директорӗн ҫумӗ Елена Еделеева. Ӗҫе конкурса «Химик» культура ҫурчӗ тӑратнӑ.
Чӑваш халӑхӗн менталитетне тӗпченине халалланӑ спектакльсен «Моя Чувашия» трилогийӗн авторӗ — Алексей Болдырев. Вӑл — Чӑваш патшалӑх культурӑпа ӳнер институтӗнче актёр ӑсталӑхӗн тата режиссура кафедрин доценчӗ. Ӗҫе конкурса ҫав институт тӑратнӑ.
Е. Иванова-Блинован «Сурский рубеж» оперине Чӑваш патшалӑх оперӑпа балет театрӗ сӗннӗ.
+9.3 °C