Раҫҫейри паллӑ юрӑҫ, Раҫҫей халӑх артисчӗ, 59 ҫулти Филипп Киркоров Шупашкарта ҫуралса ӳснӗ 20-ри хӗре, 2024 ҫулта «Раҫҫей мисӗ» пулса тӑнӑ Валентина Алексеевӑна юратнине пӗлтернӗ. Ҫакна вӑл халӑх умӗнчех каланӑ.
Ку ҫурла уйӑхӗн 23-мӗшӗнче «Ҫӗнӗ хум» конкурсра пулса иртнӗ. Киркоров «Луиза» юрра шӑрантарнӑ хыҫҫӑн Валентинӑна сцена ҫине илсе тухнӑ.
«Ҫакна кулиса хыҫӗнче шӑппӑн, хӑйне кӑна мар, пурин умӗнче те калас килет. Валентина, эпӗ сана юрататӑп! Сана манӑн пурнӑҫра пурришӗн, илемӳшӗн, вӑй-халушӑн тавах, санпа юнашар чухне тата лайӑхрах пулас, юрату пирки юрлас килет», – тенӗ Филипп Киркоров.
Валентина ку уншӑн кӗтменлӗх пулнин пӗлтернӗ. «Йӑлтах тӗлӗкри пек», – тенӗ вӑл.
Сӑмах май, «Луиза» юрӑпа нумаях пулмасть Турцире клип ӳкернӗ. Унта Валентина Алексеева хутшӑннӑ. Киркоров ӑна унта ӳкерӗнме хӑй сӗннӗ.
«Раҫҫейри ӗҫ» кадрсен центрӗнче «Профессире чи лайӑххи» конкурсӑн регионти тапхӑрне пӗтӗмлетнӗ. Шупашкар хулинче ӗҫлекен Екатерина Иванова «Чи лайӑх карьера консультанчӗ» номинацире мала тухнӑ. Халӗ унӑн Чӑваш Ен чысне федераци шайӗнче хӳтӗлемешкӗн хатӗрленмелле.
Чи лайӑх кадрсен центрӗ Етӗрнери центр тесе палӑртнӑ. Ӑна Михаил Чернов ертсе пырать. Ҫурла уйӑхӗнче 10-мӗшӗ валли хатӗрленӗ статистика кӑтартнӑ тӑрӑх, Етӗрне районӗнче регистрациленӗ 53 ӗҫсӗр ҫын пуҫне вӑтамран пилӗк ваканси лекет.
Палӑртса хӑварар: конкурс «Кадрсем» наци проекчӗпе килӗшӳллӗн виҫҫӗмӗш ҫул иртет. Ӑна специалистсен професси ӑсталӑхне ӳстерес тӗллевпе йӗркелеҫҫӗ.
Ҫӗмӗрле районӗнче республика шайӗнчи «Чи лайӑх вӑрман касакан – 2026» конкурс иртнӗ. Пӗтӗмлетӳсем паллӑ.
Малтан палӑртса хӑварар: кӑҫал унта тӗрлӗ регионти специалистсем хутшӑннӑ – Чӑваш Республикинчен, Мари Элтен, Карели Республикинчен, Мускав облаҫӗнчен тата Тутарстан Республикинчен.
Тӳресем вӑрман касакансем мӗнле техникӑпа тата хӑвӑртлӑхпа ӗҫленине, хӑрушсӑрлӑх техникине пӑхӑннине хакланӑ. Хальхинче ҫӗнтерӳҫӗ ятне Улатӑр лесничествинче ӗҫлекен Сергей Фадеев тивӗҫнӗ. Иккӗмӗш вырӑна вара Вӑрнар районӗнчи специлист Алексей Иванов йышӑннӑ. Виҫҫӗмӗш вырӑна Шӑмӑршӑ районӗнчи специалиста Сергей Семенова панӑ.
Палӑртса хӑварар: республика шайӗнчи «Чи лайӑх вӑрман касакан» конкурса 2005 ҫултанпа ирттереҫҫӗ, унта кашни ҫулах вӑрман хуҫалӑхӗнче тӑрӑшакан специалистсем тупӑшаҫҫӗ.
«Тӑван чӗлхепе литературӑна вӗрентекен чи лайӑх учитель» Раҫҫейри V конкурса Шупашкарти Роза Морозова хутшӑнӗ.
Чӑваш Енӗн влаҫ органӗсен официаллӑ порталӗнче пӗлтернӗ тӑрӑх, ку конкурс педагогсемшӗн сумлӑ ӑмӑрту шутланать.
Роза Анатольевна — аслӑ категориллӗ учитель. Вӑл Шупашкарти 62-мӗш шкулта ӗҫлет.
Педагогсен конкурсӗн финалӗ Липецк хулинче ҫурла уйӑхӗн 7-11-мӗшӗсенче иртӗ. Унта ҫӗршыври 87 субъектри 131 педагог пырса ҫитӗ.
Роза Анатольевна каланӑ тӑрӑх, ача чухне вӑл шкулта ӗҫлеме шухӑшламан, сцена ҫине тухма ӗмӗтленнӗ. Анчах паян унӑн кураканӗсем — ачасем. Тӑван халӑх культурине юратнӑран вӑл Чӑваш патшалӑх педагогика университетне вӗренме кӗнӗ. Ачасене чӑваш чӗлхипе вӑйӑ, чӗрӗ калаҫу, пултарулӑх урлӑ кӑсаклантарса яма тӑрӑшать.
Шупашкар хула кунӗнче дизайнерсен конкурсӗ иртнӗ. Пӗтӗм тӗнчери дизайнер ӑсталӑхӗн тата наци тумӗн I пӗтӗм тӗнчери конкурсне «Этно‑диалог — 2026» ят панӑ. Ӑна Раҫҫейри халӑхсен ассамблейин Чӑваш Енри уйрӑмӗ йӗркеленӗ.
Конкурса хутшӑнакансем хулари «Пехет» агромаркетра (халӗ чылай мероприятире унта ирттерме тӑрӑшаҫҫӗ) тӗрлӗ культурӑпа паллаштарма пухӑннӑ.
Дизайнер ӑсталӑхӗн тата наци тумӗн конкурсне Раҫҫейри халӑхсен пӗрлӗхӗн ҫулталӑкне тата Чӑваш Енри халӑх туслӑхӗн ҫулталӑкне халалланӑ. Дизайнерсем халӑхӑн пуян эткерлӗхне паянхи кун ыйтнине кура кӑтартса пама тӑрӑшнӑ.
Чӑваш эрешӗллӗ тум ҫӗлекенсем те ку конкурса тивӗҫлипе хутшӑннӑ.
Пултарулӑх мероприятине юрӑ-ташӑ ӑстисем те илем кӳнӗ.
Ҫӗмӗрле районӗнче республика шайӗнчи професси ӑсталӑхӗн конкурсӗ иртет. Хальхинче вӑрман касакансем тупӑшаҫҫӗ. Конкурса вӑрман хуҫалӑхӗн тата вӑрман промышленноҫ комплексӗн ӗҫченӗсем хутшӑнаҫҫӗ.
Конкурса рабочи профессийӗсен ят-сумне ӳстерес тесе йӗркелеҫҫӗ. Вӑл «Экологи ырлӑхӗ» наци проекчӗпе килӗшӳллӗн иртет.
Конкурса хутшӑнакансем пурте – 18 ҫултан аслӑрах, кашнин 2 ҫултан сахалрах мар опыт пур. Кунсӑр пуҫне кашнин хӑйӗн ятарлӑ тумӗ тата бензопӑчкӑ пур. Вӗсен пилӗк задание пурнӑҫлама тивӗ: йывӑҫ касса антарасси, сӑнчӑра улӑштарасси, раскряжевка, тӗплӗ раскряжевка тата турат касасси.
Ҫӗнтерӳҫӗсене мӗн чухлӗ балл пухнине кура палӑртӗҫ. Призерсем, 1-3-мӗш вырӑнсене йышӑннисем ЧР Ҫут ҫанталӑк министерствин дипломне тивӗҫӗҫ.
Чӑваш Енре «Кӗмӗл калем. Серебряное перо» конкурс иртет. Ӑна Чӑваш кӗнеке издательстви йӗркеленӗ. Пултаруллӑ ҫамрӑк авторсене палӑртмалли конкурса хутшӑнакан ӗҫсене йышӑнас вӑхӑта чӳк уйӑхӗччен тӑснӑ.
Пултарулӑх конкурсне 18-35 ҫулсенчи ҫамрӑксем хутшӑнма пултараҫҫӗ. Заявкӑсене кӑҫалхи чӳк уйӑхӗн 1-мӗшӗччен йышӑнӗҫ.
Конкурс номинацийӗсем ҫапларах:
• Илемлӗ проза (вырӑсла тата чӑвашла хайлавсене уйрӑмшарӑн хаклӗҫ)
• Поэзи (вырӑсла тата чӑвашла хайлавсене уйрӑмшарӑн хаклӗҫ)
• Документлӑ проза (вырӑсла тата чӑвашла хайлавсене уйрӑмшарӑн хаклӗҫ)
• «Ӳкерчӗксемпе сӑнӳкерчӗксенчи истори (комикссем)» ятарлӑ номинаци.
Ӗҫсене вырӑсла тата чӑвашла йышӑнаҫҫӗ. Ҫӗнтерӳҫӗне 50 пин тенкӗ гран-при лекӗ.
Шупашкар хулинче «Илемпи» мода тата илем конкурсӗ иртӗ. Унпа килӗшӳллӗн тумтир дизайнерӗсен конкурсне йӗркелӗҫ.
Йӗркелӳҫӗсем тумтир ӑстисене хӑйсене тата коллекцие кӑтартма чӗнеҫҫӗ. Вӑхӑт нумай юлман – конкурс ҫурла уйӑхӗн 15-мӗшӗнче Шупашкар хулинчи «Каскад» суту-илӳ центрӗнче пулӗ. Кӑҫалхи тема – «Коммерци моди». Коллекцин хальхи трендсене уҫса памалла, пысӑк пахалӑхпа уйрӑлса тӑмалла. Кунсӑр пуҫне рынока илсе тухса вӗсене сутмашкӑн шухӑшсем сӗнмелле,
«Кашни кӑтарту – хӑвӑра кӑтартмалли май. Подиума тухни – пултарулӑх шухӑшне коммерци проектне ҫавӑрма май паракан шанчӑк», — ҫапла палӑртаҫҫӗ йӗркелӳҫӗсем.
Чӑваш поэчӗсем Пӗтӗм тӗнчери «Туслӑх ҫыранӗсем» конкурсра палӑрнӑ. Кун пирки МАХри «Хыпар - Вести Чувашия» канала вуласа пӗлтӗмӗр.
Унта хыпарланӑ тӑрӑх, Л. Север ячӗллӗ «Туслӑх ҫыранӗсем» Пӗтӗм тӗнчери поэзипе куҫару конкурс-фестивалӗ Ростов облаҫӗнче кӑҫал 11-мӗш хут иртнӗ. Унта Раҫҫейри тӗрлӗ регионтан тата ют ҫӗршывсенчен сӑвӑҫсем хутшӑнаҫҫӗ, пӗр-пӗрин хайлавӗсене тепӗр чӗлхене куҫарассипе ӑмӑртаҫҫӗ иккен. Тӗп номинацире Ҫӗрпӳ округӗнчи Кӗҫӗн Тивӗш ялӗнче пурӑнакан Дмитрий Трофимов финалистсен шутне кӗнӗ. Чӑваш кӗнеке издательствин редакторӗ, РФ Писательсен союзӗн членӗ Ольга Австрийская (Иванова) вара наставник пек хутшӑннӑ. Вӗсен куҫарӑвӗсем ятарлӑ кӗнекере пичетленсе тухӗҫ.
Конкурсӑн ытти номинацине хутшӑнакан та сахал мар пулнӑ. РФ Писательсен союзӗн пайташӗ Галина Матвеева «Эпир пӗрле» номинацире – 3-мӗш, «Ачалӑха илсе каякан ҫул» номинацире 1-мӗш вырӑн ҫӗнсе илнӗ.
Чӑваш Енре вӑрман касакансен конкурсӗ кӑҫал та иртӗ.
Республикӑн Ҫутҫанталӑк ресурсӗсен тата экологи министерстви унта хутшӑнма вӑрман хуҫалӑхӗн тата вӑрман промышленноҫ комплексӗн ӗҫченӗсене йыхравлать иккен. Заявкӑсене ҫурла уйӑхӗн 12-мӗшӗччен йышӑнаҫҫӗ. Ӑна маларах асӑннӑ министерствӑра (вӑл Шупашкарти Ленинград урамӗнчи 33-мӗш ҫуртра вырнаҫнӑ) йышӑнаҫҫӗ. Чупса ҫӳремесен те тем мар, мӗншӗн тесен minpriroda@cap.ru электрон почтӑпа та ярса пама пулать.
Конкурса хутшӑнас тесен ку енӗпе икӗ ҫултан кая мар ӗҫлемелле. Вӑрман касаканӑн свидетельстви, ятарлӑ тум тата бензопӑчкӑ пулмалла.
Конкурс вӑхӑтӗнче ӑстасен йывӑҫ касса ҫеҫ мар, сӑнчӑр улӑштарса, пӗренене икӗ тӗрлӗ касса тата турат иртсе ӑмӑртма тивӗ.
-0.7 °C