Тӑвай округӗнчи Тӑрмӑш ялӗнчи Димитриевсем 70 ҫул пӗрле пурӑннине паллӑ тунӑ. Александр Димитриевичпа Ефросиния Степановна ҫавӑн чухлӗ ҫул пӗр сукмакпа килӗштерсе утаҫҫӗ.
Александр Димитриевич ялти клуб ертӳҫинче нумай ҫул ӗҫленӗ. Ефросиния Семеновна колхозра вӑй хунӑ, почтамт ертӳҫинче тӑрӑшнӑ. Димитриевсем 5 ача ҫуратса ӳстернӗ.
90 ҫултан иртнӗ пулсан та вӗсем халӗ те ӗне усраҫҫӗ, пахчара ӗҫлеме те ӳркенмеҫҫӗ.
Шупашкарта пурӑнакан Раиса Юманкина 100 ҫулхи юбилейне паллӑ тунӑ. Вӑл кунта 2018 ҫултанпа пурӑнать – хӗрӗпе пӗрле куҫса килнӗ.
Раиса Сергеевна Тутарстанри Кӑнна Кушки ялӗнче ҫуралса ӳснӗ. Вӑрҫӑ вӑхӑтӗнче колхозра ӗҫленӗ, хӗл валли вутӑ хатӗрленӗ. Вӑрҫӑ пӗтсен тӑван ялӗнче вулавӑшра тӑрӑшнӑ, фермӑра заведующи пулнӑ.
Кинемее юбилейпе саламлама тӑванӗсем, ҫывӑх ҫыннисем, Шупашкарти «Кӑнтӑр» культура ҫуртӗнчи фольклор ансамблӗн артисчӗсем килнӗ, вӗсем чӑвашла юрӑсем шӑрантарнӑ.
Халӗ Раиса Юманкина 9 мӑнукӗпе, 11 кӗҫӗн мӑнукӗпе савӑнса пурӑнать.
Шупашкарта пурӑнакан Валентина Вислобокова 103 ҫул тултарнӑ. Валентина Петровна 1922 ҫулта Рязань облаҫӗнчи Шацк хулинче ҫуралнӑ. Вӑл йывӑр ӗҫ мӗн иккенне ҫамрӑкранпах пӗлет — вӑрҫӑ ҫулӗсенче окоп чавнӑ, Рязаньти заводра ӗҫленӗ, снарядсен пахалӑхне тӗрӗслесе тӑнӑ.
1942 ҫулта Валентин Шупашкара куҫса килнӗ. Вӑрҫӑ пӗтсен вара вӑл пӗртӑванӗсемпе пӗрле Кемерево облаҫне тухса кайнӑ, шахтӑра кӑмрӑк кӑларнӑ. Каялла Шупашкара таврӑнсан стоматологи поликлиникинче санитаркӑра нумай ҫул ӗҫленӗ. Халӗ ӑна хулари «Текстильщик» микрорайонта нумайӑшӗ пӗлет.
Софья Ульянова 100 ҫулхи юбилейне кӗтсе илнӗ. Ӑна саламлама тӳре-шара, ветерансен организацийӗн элчисем килнӗ.
Софья Николаевна Элӗк ялӗнче пурӑнать. Вӑл чухӑн ҫемьере ҫуралнӑ, ашшӗне ир ҫухатнӑ. Шкулта чи лайӑх вӗренекенсенчен пӗри пулнӑран ӑна учительте ӗҫлеме хӑварнӑ. Кайран вӑл педагогика пӗлӗвӗ илнӗ.
1946 ҫулта вӑл Николай Ульяновпа пӗрлешнӗ, вӗсем 7 ача ҫуратса ӳстернӗ. Ӑна III степень «Амӑшӗ героиня» ята панӑ.
Мӑшӑрне, аслӑ хӗрне пытарнӑ пулин те Софья Николаевна малалла пурӑнма вӑй тупнӑ. Унпа юнашар – ачисем, мӑнукӗсем, кӗҫӗн мӑнукӗсем, кӗҫӗн мӑнукӗн ачи.
Тивӗҫлӗ канури хӗрарӑм ултавҫӑсене укҫа парас тесе Мускавах самолетпа вӗҫнӗ.
Ку Шупашкарта пурӑнакан 78 ҫулти хӗрарӑмпа пулса иртнӗ. Вӑл ултавҫӑсене 1 млн та 700 пин тенкӗ куҫарса панӑ.
Ун патне домофон улӑштармалла тесе шӑнкӑравланӑ. Хӗрарӑм хӑйӗн даннӑйӗсене пӗлтернӗ, кун хыҫҫӑн унпа темиҫе палламан ҫын ҫыхӑннӑ: опер, юрист... Вӗсем ӑна хӑратса, пӑрахнӑ. Ҫапла вӑл мӗн хушнине пурнӑҫланӑ. Ӑна 75-ри арҫынпа тӗл пулма хушнӑ, унран 1 миллион тенкӗ илме ыйтнӑ. Ҫак арҫын та улталаннӑ. Унтан хӗрарӑма хӑйӗн укҫине хушса курьера парса яма каланӑ. Унӑн укҫа татах пуррине пӗлсен ултавҫӑсем ун валли Мускава самолетпа вӗҫме билет туянса панӑ.
Хайхи «юрист» ҫыхӑнӑва тухма пӑрахсан тин хӗрарӑм хӑйне улталанине ӑнланнӑ.
Ҫӗрпӳ округӗнчи Паваркассинче пурӑнакан Александр Андреев 100 ҫул тултарнӑ.
Александр Андреевич Тӑван ҫӗршывӑн Аслӑ вӑрҫи ҫулӗсенче колхозра конюхра ӗҫленӗ. Кайран сысна пӑхнӑ. 1954, 1955, 1956 ҫулсенче «Республикӑри чи лайӑх сысна пӑхакан» ята тивӗҫнӗ вӑл. Кайран, иртнӗ ӗмӗрӗн 70-80-мӗш ҫулӗсенче, Александр Андреевич фермӑра ӗне сунӑ, «Цивиль» совхозра поварта та ӗҫленӗ. Унӑн чун киленӗҫӗ те пулнӑ — вӑл вырӑнти «Кӑмӑл» ансамбльте юрланӑ.
Юбилейра Александр Андреева РФ Президенчӗн Владимир Путинӑн саламлӑ открыткине парнеленӗ.
Республикӑра «Кӗр парнисем» ярмӑрккӑна пӗтӗмлетнӗ. Аса илтерер: вӑл авӑн уйӑхӗн 13-мӗшӗнченпе Чӑваш Енре 49 лапамра иртнӗ. Унта вырӑнти ял хуҫалӑх предприятийӗсен, фермерсен экологи тӗлӗшӗнчен таса ҫимӗҫӗсене йӳнӗрехпе туянма май пулнӑ.
Икӗ уйӑхра ярмӑрккӑра 512 тонна ытла ҫимӗҫ сутнӑ. Ытларах ҫӗрулми (63%) туяннӑ. Кӑҫал тин татнӑ ҫырласем те туянма май пулнӑ. Ҫавӑн пекех вырӑнти произоводительсем аш-какай, пыл, калчасем, вӑрлӑхсем, кукӑль таврашӗ сутнӑ.
Сутуҫӑсене вырӑнпа тӳлевсӗрех тивӗҫтернӗ. Тивӗҫлӗ канурисене, ветерансене тата сусӑрсене ҫимӗҫсене киле ҫитиех леҫсе панӑ.
Сӗнтӗрвӑрри округӗнчи Карапаш ялӗнче пурӑнакан Любовь Сударкина 100 ҫулхи юбилейне паллӑ тунӑ.
Тӑван ҫӗршывӑн аслӑ вӑрҫи вӑхӑтӗнче вӑл колхозра ӗҫленӗ. Вӑрҫӑ пӗтсен вӗренес тесе агроном специальноҫне илнӗ, кайран вара педагогикӑна ӗҫлеме куҫнӑ. Ҫапла вӑл биологипе хими учителӗнче 30 ҫул ытла вӑй хунӑ.
Студент чухне Любовь Филипповна Апполон ятлӑ ҫар ҫыннине килӗштернӗ. Каччӑ Балтика флотӗнче службӑра тӑнӑ, хӗр вара ӑна 5 ҫул кӗтсе пурӑннӑ. Ҫулталӑкран ҫамрӑксем ҫемье ҫавӑрнӑ. Вӗсем 43 ҫул пӗрле пурӑннӑ, ҫурт лартнӑ, 3 ача ҫуратса ӳстернӗ. Халӗ Любовь Филипповнӑн — 6 мӑнук, 11 кӗҫӗн мӑнук.
Ӗнер ирхине Шупашкарта шыв турттаракан ГАЗель водителӗ ҫынна таптаса кайнӑ. Ку инкек Мир проспектӗнче автовокзал патӗнче пулнӑ.
ГАЗель рулӗ умӗнче 29 ҫулти арҫын ларнӑ. Вӑл ҫуран утакансем ҫӳрекен вырӑнта каялла каялла чакнӑ чухне 75 ҫулти арҫынна асӑрхаман – ун ҫине пырса кӗнӗ. Арҫын ӳксе машина айнех пулнӑ.
Ӑна пульницӑна илсе ҫитернӗ. Анчах, шел те, тухтӑрсем унӑн пурнӑҫне ҫӑлайман – вӑл темиҫе сехетрен вилнӗ.
Паян ирхине Муркаш округӗнче 86 ҫулти водитель аварие лекнӗ. Ку инкек 6 сехет те 40 минутра пулнӑ.
Ватӑ арҫын машинӑпа пынӑ чухне руле итлеттереймен те кювета чӑмнӑ. Вӑл – 3-мӗш ушкӑнри сусӑр, водитель стажӗ – 68 ҫул. Ҫав вӑхӑтра вӑл хӑрушсӑрлӑх пиҫиххипе ҫыхӑннӑ пулнӑ.
Вырӑна ҫитнӗ тухтӑрсем унӑн инсульт пулнине палӑртнӑ, ӑна Шупашкара Васкавлӑ медпулӑшу пульницине илсе ҫитернӗ.
Халӗ ку ӗҫ тӗлӗшпе тӗрӗслев пырать.
+0.3 °C