Куславкка округӗнчи Аслӑ Куснарта пурӑнакан Валентина Челышева 101 ҫул тултарнӑ.
Вӑл ача чухне тухтӑр пулма ӗмӗтленнӗ, анчах шӑпа ӑна урӑх ҫулпа илсе кайнӑ. Тӑван ҫӗршывӑн Аслӑ вӑрҫи вӑхӑтӗнче Валентина Якимовна автофургонсем кӑларакан заводра ӗҫленӗ, унтан Иваново облаҫӗнче вӑрман хатӗрленӗ ҫӗрте тӑрӑшнӑ. Тӑван ялне таврӑнсан колхозра хӑмла ӑсти пулнӑ. Унтанах тивӗҫлӗ канӑва тухнӑ.
Унӑн ҫемйи пысӑк: 6 ача, 13 мӑнук, 23 кӗҫӗн мӑнук. Вӗсемпе савӑнса пурӑнать вӑл.
Ӗнер, нарӑсӑн 9-мӗшӗнче, ирхине Канаш хулинчи Ҫамрӑксен урамӗнче пушар пулнӑ – харпӑр ҫуртра ҫулӑм тухнӑ.
Инкек вӑхӑтӗнче пӳртре 73 ҫулти арҫын тата унпа пӗрле пурӑнакан 56-ри хӗрарӑм пулнӑ. Хӗрарӑм ҫунакан пӳртрен хӑй тӗллӗнех тухса ӗлкӗрнӗ. Пиҫсе кайнӑскере пульницӑна илсе кайнӑ. Шел те, арҫын урама тухайман – пушарта вилнӗ.
Ҫӑлавҫӑсем пушара 3 сехете яхӑн сӳнтернӗ.
Паян республикӑри чи аслӑ ҫынпа, 107 ҫула кайса пурнӑҫран уйрӑлнӑ вӑрҫӑ ветеранӗпе Иван Ермолаевпа сывпуллашнӑ.
Вӑл Етӗрне хулинче пурӑннӑ. Иртнӗ ҫул, 106 ҫул тултарсан, вӑл Раҫҫей ветеранӗсен Чӑваш Енри уйрӑмӗн пайташӗ пулса тӑнӑ. Ун чухне ветеран хаваспах наци тумне тӑхӑнса сӑн ӳкерӗнмелли акцие хутшӑннӑ.
Етӗрнен хисеплӗ ҫыннине Етӗрне масарӗнче пытарнӑ.
Патӑрьел округӗнчи Тикеш ялӗнче пуранӑкан Елизавета Демьянова 101 ҫул тултарнӑ. Ҫак ҫула ҫитсен те вӑл вӑй-хал енчен аптӑрамасть, халӗ те алла тӑмра тытма юратать.
Елизавета Алексеева ача чухне мусӑкҫӑ пулма ӗмӗтленнӗ, ҫак тӗллевпе Шупашкарти училищӗне те вӗренме кӗнӗ. Анчах вӑрҫӑ пуҫланнӑ та унӑн ӗмӗчӗ пӑчланнӑ: Елизавета медицина енӗпе ӑс пухса ҫынсене сипленӗ. Вӑл 1948 ҫулта Тикеш ялӗнче трахома чирне парӑнтарас ҫӗре хутшӑннӑ.
Елизавета Алексеевна мӑшӑрӗпе 5 ача ҫуратса ӳстернӗ. Халӗ кинемейӗн — 6 мӑнук, 5 кӗҫӗн мӑнук.
Йӗпреҫ округӗнчи Буинск поселокӗнче пурӑнакан Зифа Валлиулина 95 ҫулхи юбилейне паллӑ тунӑ.
Зифа Фарахатдиновна 1931 ҫулта ҫуралнӑ. Чылай йывӑрлӑха чӑтса ирттернӗ вӑл: вӑрҫӑ, выҫлӑх… Вӑрҫӑ вӗҫленсен те лӑпкӑ пурнӑҫ пулман: ял хуҫалӑхне ура ҫине тӑратма пулӑшнӑ.
Паянхи кун вӑл 6 ачипе, 10 мӑнукӗпе, 7 кӗҫӗн мӑнукӗпе савӑнса пурӑнать. Мӑшӑрӗ ир ҫӗре кӗни ҫеҫ кулянтарать ӑна.
Шупашкарта пурӑнакан Валерия Захарова 90 ҫул тултарнӑ.
Валерия Григорьевна 1936 ҫулхи кӑрлач уйӑхӗн 31-мӗшӗнче Сталинградра ҫуралнӑ. 1953 ҫулта вӑл аслисемпе пӗрле Челябинска куҫса кайнӑ. Унти политехника институтӗнчи металлурги факультетӗнчен вӗренсе тухнӑ. Чылай ҫул Челябинскри трактор заводӗнче тӑрӑшнӑ. 1973 ҫулта ӑна Шупашкара ӗҫлеме куҫарнӑ, кунта вӑл «Промтрактор» заводра тӑрӑшнӑ.
Кинемее халӗ Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ пӑхса пулӑшать. Ватӑ ҫын ахаль ларма юратмасть, каҫӑхса кайса кӗнеке вулать. Юбилейпа ӑна социаллӑ центрӑн специалисчӗ Алина Михайлова тата Татьяна Шихранова социаллӑ ӗҫчен саламланӑ.
Канаш хулинче пурӑнакан Татьяна Смагина 101 ҫул тултарнӑ. Вӑл Курган облаҫӗнче ҫуралнӑ. Вӑрҫӑ ҫулӗсенче унти предприятире тӑрӑшса Ҫӗнтерӗве ҫывхартнӑ.
Уралти политехника институтӗнче инженер-механик дипломне илсен Татьяна Васильевна техникумра ӗҫлеме тытӑннӑ.
Мӑшӑрӗпе вӑл нумай ҫул телейлӗ пурӑннӑ. Вӑл ҫӗре кӗрсен Канаш хулине унӑн тӑванӗсем патне куҫса килме шухӑшланӑ. Кунта вӑл 2002 ҫултанпа пурӑнать.
Муркаш округӗнчи Турай тӑрӑхӗнче пурӑнакан Ольга Краснова ҫак кунсенче 100 ҫулхи юбилейне паллӑ тунӑ.
Ольга Дмитриевна Уйкас ялӗнче ҫуралса ӳснӗ. Ҫамрӑклах колхоз ӗҫне кӳлӗннӗ, фронта кайнӑ арҫынсен вырӑнне тӑрӑшнӑ.
Вӑл – тыл ӗҫченӗ. Ҫӗнтерӗве ҫывхартма пулӑшнӑшӑн ӑна «1941-1945 ҫулсенчи Тӑван ҫӗршывӑн Аслӑ вӑрҫинче хастар ӗҫленӗшӗн» медальпе чысланӑ.
Ҫӗрпӳ округӗнчи Сӑнав поселокӗнчи Нина Иванова 102-мӗш ҫуралнӑ кунне паллӑ тунӑ. Вӑл – тыл ӗҫченӗ, ӗҫ ветеранӗ, Тӑван ҫӗршывӑн Аслӑ вӑрҫи вӑхӑтӗнчи нушана курнӑ.
Нина Николаевна 1924 ҫулта Шупашкарта ҫуралнӑ. 1941 ҫулта унӑн ашшӗне элеклесе тӗрмене хупнӑ, вӑл унта вилнӗ. Ҫемье кил-ҫуртсӑр юлнӑ.
Вӑрҫӑ вӑхӑтӗнче Нина Иванова эвакуаципе килнӗ савутра фрезер станокӗпе ӗҫленӗ. Вӑрҫӑ пӗтсен Чӑваш ял хуҫалӑх институтӗнче вӗреннӗ, пулас упӑшкипе Николай Ивановичпа паллашнӑ. Вӗсем икӗ ача ҫуратса ӳстернӗ.
Патӑрьел округӗнчи Шӑнкӑртам ялӗнче пурӑнакан Миникадира Зейдулловна Хамбикова 101 ҫул тултарнӑ.
Вӑл Ыхраҫырми ялӗнче нумай ачаллӑ ҫемьере ҫуралнӑ. Миникадира Зейдулловна – ӗҫ ветеранӗ, яланах тӳрӗ кӑмӑлпа ӗҫленӗ. Ҫак ҫула ҫитсе вӑл тӑваттӑмӗш арӑвне курнӑ.
Кинемей вӑрӑм пурнӑҫ вӑрттӑнлӑхне уҫнӑ: ӑмсанмалла мар, ӳркенмелле мар, пурнӑҫ ҫине оптимистла пӑхмалла.
Кинемее 101 ҫул тултарнӑ ятпа Раҫҫей президенчӗ те саламланӑ, открытка янӑ.
+11.3 °C