Вӑрнар округӗнче 64 ҫулти хӗрарӑм кӑмпана кайнӑ та киле таврӑнман. Ӑна халӗ «Лиза Алерт» шыравпа ҫӑлав отрячӗн хастарӗсем шырасҫӗ.
Елизавета Григорьевна Волкова Вӑрнар округӗнчи Услапа ялӗнче пурӑнать. Вӑл авӑн уйӑхӗн 14-мӗшӗнче вӑрмана кӑмпа пуҫтарма кайнӑ. Анчах килте ӑна кӗтсе илеймен.
Елизавета Григорьевна ҫав кун камуфляжлӑ симӗс пиншак, хура шӑлавар, хура калуш тӑхӑннӑ, хӑйӗнпе пӗрле ҫутӑ симӗс витре илнӗ. Ҫакӑ паллӑ: ӑна медицина пулашӑвӗ кирлӗ. Хӗрарӑм 167 сантиметр ҫӳллӗш, вӑтам пӳ-силлӗ, хура ҫӳҫлӗ, хӑмӑр куҫлӑ.
Хӗрарӑма курнӑ тӑк отряд хастарӗсем ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр) е 89876687081 (шырав инфоргӗ Искрич (Виктория).
Сӑмах май, нумаях пулмасть Шупашкар округӗнчи Кивҫурткассинче 92 ҫулти кинемее тупнӑ. Анчах, шел те унӑн виллине кӑна.
Ҫулла пуҫланнӑранпа Чӑваш Республикинчи шыравпа ҫӑлав службин ӗҫченӗсем вӑрманта ҫухалса кайнӑ 14 ҫынна пулӑшнӑ. Ҫапла пӗлтерет Инкеклӗ лару-тӑру министерствин Чӑваш Енри тӗп управленийӗ.
Ҫак ҫынсем ҫырла-кӑмпа пуҫтарнӑ е уҫӑлса ҫӳренӗ чух ҫухалса кайнӑ. Анчах каялла тухмалли ҫула хӑйсем тӗллӗн тупайман. Ҫӑлавҫӑсен ку ӗҫӗ малалла та пулӗ-ха, кӑмпа сезонӗ вӗҫленмен. Ҫавӑнпа вӗсем тимлӗ пулма асӑрхаттараҫҫӗ. Вӑрмана каяссине ҫывӑх ҫынсене пӗлтермелле, пӗрле тулли зарядлӑ телефон илмелле. Ҫутӑ тум тӑхӑнма та манмалла мар. Вӑрманта ориентирсене астуса юлма тӑрӑшмалла. Ҫухалса кайсан ҫийӗнчех 112 номерпе шӑнкӑравламалла.
Ҫухалса кайнисене ҫӑлавҫӑсем кӑна мар, волонтерсем те, ШӖМ тата ытти ведомство ӗҫченӗсем те шыраҫҫӗ
Чӑваш Енре вӑрмана кӑмпана кайсан ҫухалнӑ арҫынна овчарка тупма пулӑшнӑ.
Сӗнтӗрвӑрри районӗнче пурӑнакан 57-ри арҫын Улатӑр районӗнчи вӑрмана, хӑй пачах пӗлмен вырӑна, кӑмпана кайнӑ. Ҫухалнине пӗлсен ӑна тӑванӗсем хӑйсем тӗллӗн тупайман, полицирен пулӑшу ыйтнӑ.
Йӗрке хуралҫисем Кобра ятлӑ Бельги овчарккипе ҫула тухнӑ. Йытӑ йӗр шӑршине тупса ун тӑрӑх кӑмпа тултарнӑ хутаҫ патне илсе ҫитернӗ. Арҫынна вара ирхине тупнӑ. Вӑл Улатӑр округӗнчи Ҫӗнӗ Выҫли ялӗнчен каякан ҫул ҫинче пулнӑ.
Полици асӑрхаттарать: вӑрмана кайнӑ чух кун пирки ҫывӑх ҫыннӑрсене пӗлтермелле, тулли заряд тунӑ телефон илмелле. Кун пирки уйрӑмах ватӑ ҫынсене ӑнлантармалла.
Таиландра ҫухалнӑ 19 ҫулти хӗр ашшӗ-амӑшӗпе ҫыхӑннӑ. Кун пирки ШӖМ пӗлтерет.
Анна Горшкова ҫывӑх ҫыннисемпе видео урлӑ ҫыхӑннӑ, унӑн йӑлтах лайӑххине, вӑл Бангкокра пулнине пӗлтернӗ, укҫа ыйтман.
Аса илтерер: Шупашкарта пурӑнакан 19 ҫулти Анна Горшкова Чулхулара вӗреннӗ, ҫу уйӑхӗнче вӑл кӗтмен ҫӗртен Раҫҫейрен тухса кайнӑ. Кун пирки никама та каламан-мӗн.
Ҫу уйӑхӗн 19-мӗшӗнче вӑл «Мускав-Пекин» рейспа вӗҫсе кайнӑ. Китайри Раҫҫей посольствинче пӗлтернӗ тӑрӑх, ҫу уйӑхӗн 21-мӗшӗнче Таиланда вӗҫме билет туяннӑ. Унтан вӑл ӑҫта ҫул тытни паллӑ мар.
Каяс умӗн хӗр амӑшӗ патне каярах вуламашкӑн ҫыру хӑварнӑ, унта вӑл хӑй хӑрушсӑрлӑхра иккенне, ӑна никам та тытса чарманнине, пурнӑҫри хӑйӗн вырӑнне шырама тухса кайнине пӗлтернӗ. Ҫывӑх ҫыннисене хӗр шӑв-шав ҫӗклеме, полицие хыпарлама хушман.
Атӑл леш енче кӑмпана кайсан ҫухалнӑ 65-ри арҫынна шыраҫҫӗ. Геннадий Михайлович Константинов ҫурла уйӑхӗн 20-мӗшӗнче «Заволжье» сад юлташлӑхӗ ҫывӑхӗнчен вӑрмана кайнӑ та каялла таврӑнман. Ӑна халӗ «Лиза Алерт» шыравпа ҫӑлав отрячӗн хастарӗсем те шыраҫҫӗ.
Вӑл 171 сантиметр ҫӳллӗш, ырхан кӗлеткеллӗ, ҫӳҫӗ шуралнӑ, куҫӗ кӑвак. Вӑрмана кайнӑ чухне комуфляж костюм, сӑрӑ тӗслӗ кофта, шурӑ кроссовка тӑхӑннӑ, хӑйӗнпе пӗрле шурӑ тӗслӗ витре илнӗ.
«Лиза Алерт» пуринчен те пулӑшу ыйтать. Ҫакӑн пек ҫынна курнӑ тӑк шӑнкӑравлӑр: 8 800 700-54-52 (Раҫҫейре шӑнкӑрав тӳлевсӗр). Е шырав инфоргӗпе ҫыхӑнӑр: Искрич (Виктория) 89876687081.
Сӑмах май, кӑҫал утӑ уйӑхӗнче Чӑваш Енре «Лиза Алерт» ҫӑлавпа шырав отрядне ҫын ҫухални пирки 28 заявка килнӗ.
Элӗк тӑрӑхӗнче вуннӑмӗш кун ӗнтӗ 36 ҫулти арҫынна шыраҫҫӗ. Ку ӗҫе «Лиза Алерт» шыравпа ҫӑлав отрячӗн хастарӗсем те хутшӑнаҫҫӗ.
Андрей Николаевич Долгов килтен утӑ уйӑхӗн 3-мӗшӗнче тухса кайнӑ. Унтанпа вӑл ӑҫта пулни паллӑ мар. Андрей Долгов Элӗкре пурӑнать.
Вӑл 164 сантиметр ҫӳллӗш, ырхан кӗлеткеллӗ, ҫӳҫӗ тӗттӗм, куҫӗ хӑмӑр. Килтен кайнӑ чухне тӗттӗм хӗрлӗ тӗслӗ куртка, камуфляж тӗслӗ шӑлавар, ҫавӑн тӗслех калуш тӑхӑннӑ пулнӑ.
Ҫак арҫын пирки мӗн те пулин пӗлетӗр пулсан ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр), 89777084704 Кирейчик (Екатерина) .
Чӑваш Республикинчи шыравҫӑсем 82 ҫул каялла Тӑван ҫӗршывӑн Аслӑ вӑрҫинче пуҫ хунӑ хӗр-медик виллин юлашкисене тупнӑ.
Вӗсем хальхи вӑхӑтра Карелире ӗҫлеҫҫӗ. Унта 1944 ҫулта Видлица ҫывӑхӗнче хӑрушӑ ҫапӑҫусем пынӑ. Шӑпах унта совет салтакӗсем Ладога кӳлли патӗнче тӑшмана каялла чакарнӑ.
Чӑваш Енри шыравҫӑсемпе ытти регионтисем те ӗҫлеҫҫӗ. Вӗсемпе пӗрле Хӗрлӗ Ҫарӑн медицина службин кӗҫӗн лейтенанчӗн виллин юлашкисене чавса тупнӑ.
Халӗ ҫав вырӑнта шыравсем малалла пыраҫҫӗ. Тен, хыпарсӑр ҫухалнӑ ытти салтакӑн виллин юлашкисене тупма май килӗ.
Сӗнтӗрвӑрри хулинче пурӑнакан арҫынна «Лиза Алерт» шыравпа ҫӑлав отрячӗн хастарӗсем шыраҫҫӗ. 43 ҫулти Александр Евгеньевич Венедиктов ӑҫта пулни ҫӗртме уйӑхӗн 23-мӗшӗнченпе паллӑ мар.
Вӑл килтен кайнӑ чухне кӑвак кофта, кӑвак джинс шӑлавар, шурӑ кроссовка тӑхӑннӑ пулнӑ. Арҫын 175 сантиметр ҫӳллӗш, вӑтам кӗлеткеллӗ, ҫӳҫӗ тӗттӗм ҫырӑ, куҫӗ хӑмӑр тӗслӗ.
«Лиза Алерт» хастарӗсем кирек мӗнле информацие те ҫак номерсемпе пӗлтерме ыйтаҫҫӗ: 8 800 700-54-52 (Раҫҫейре тӳлевсӗр) е Искрич (Виктория) 89876687081.
Сӑмах май, Патӑрьел округӗнчи Турхан ялӗнче 55 ҫулти Алексей Григорьева ҫӗртме уйӑхӗн 24-мӗшӗнченпе шыраҫҫӗ.
Шупашкарта икӗ кун каялла ҫухалнӑ ватӑ арҫынна шыраҫҫӗ. Кун пирки «Лиза Алерт» шыравпа ҫӑлав отрячӗ пӗлтернӗ.
Алексей Сергеевич Сергеев 73 ҫулта, вӑл ҫу уйӑхӗн 5-мӗшӗнче ҫухалнӑ. Хальччен ун пирки нимӗн те пӗлмеҫҫӗ.
Вӑл 173 сантиметр ҫӳллӗш, ҫӳҫӗ шуралнӑ, куҫӗ сӑрӑ тӗслӗ. Ҫухалнӑ чухне тӗттӗм кӑвак кофта, сӑрӑ шӑлавар, хура сланцӑ, хура калпак тӑхӑннӑ пулнӑ. Ӑна медпулӑшу кирлӗ.
Ӑна куракансене ҫак номерсемпе шӑнкӑравлама ыйтаҫҫӗ:8 800 700-54-52 (хӗрӳ лини), 8 919 666 66 80 (Наталия).
Йӗпреҫ поселокӗнче пуйӑсран тарнӑ 6 арҫынна тытса чарнӑ. Кун пирки mash канал пӗлтерет.
Вӗсем питех инҫех каяйман. Йӗрке хуралҫисем Йӗпреҫ таврашне йӑлтах шыранӑ. Пиллӗкӗшне пӗчӗк ялта, Шуркассинче, тупнӑ. Улттӑмӗшне Йӗпреҫ поселокӗнчи Черноречка микрорайонӗнче тупса тытса чарнӑ.
Аса илтеретпӗр: вӗсем тӗрмере ларнӑ чухне РФ Хӳтӗлев министерствипе контракт ҫырнӑ. Ака уйӑхӗн 8-мӗшӗнче вӗсене «Томск – Адлер» пуйӑспа ятарлӑ вакунра илсе кайнӑ. Йӗпреҫре чарӑнсан хайхискерсем тарнӑ. Ҫакна машинист курнӑ та тӳрех тивӗҫлӗ службӑсене пӗлтернӗ.
-0.7 °C