Эрнекун, пушӑн 21-мӗшӗнче, Хусанта тухса тӑракан Тутарстан чӑвашӗсен «Сувар» хаҫӑчӗ 20 ҫул тултарнине паллӑ турӗ.

Чи малтанах «Чӑвашла тухакан пичет МИХӗсен аталану йывӑрлӑхӗсем» ятлӑ ҫавра сӗтел тата Тутарстанри хуҫатҫӑсем валли ятарлӑ семинар иртрӗ. Хаҫатҫӑсене семинар вулама Шупашкартан ЧПУ преподавателӗсем килнӗччӗ.

Ҫавра сӗтеле Атӑлпа Урал тӑрӑхӗнчи чӑвашла тухакан МИХсен тӗп редакторӗсем хутшӑнчӗҫ: «Урал сассинчен» — Юрий Михайлов, «Сувар» хаҫатран — Константин Малышев, «Хыпар» издательство ҫуртӗнчен — Михаил Арланов, Чӗмпӗрти «Канаш» хаҫатӗнчен — Николай Ларионов, «Асамат & Шевле» издательствӑран — Владислав Николаев, Чӑваш халӑх сайтӗнчен — Николай (Аҫтахар) Плотников тата ытти хӑш-пӗр хӑнасем. Вӗсем халӑх тӗтелӗсене (выр. ~~социальные сети~~) ытларах тухмалли пирки; чӑвашла тухакан хаҫатсем валли реклама таврашне епле пухмаллине; чӑвашла хаҫатсем валли пӗрлешӳллӗ материал кӑларас ыйтӑва тата ыттине сӳтсе яврӗҫ.

«Сувар» хаҫатра ӗҫленӗ тата хальхи вӑхӑтра тӑрӑшакансене парнесемпе чысланӑ тата ыр сӑмахсемпе аса илнӗ хыҫҫӑн тӗрлӗ тӑрӑхран килнӗ хӑнасем Хусанти Ар масарне ҫул тытрӗҫ, __Николай Василевич Никольскийӗн__ вил тӑпри ҫине чечексем хучӗҫ. Ун хыҫҫӑн Хусан-Аренӑпа паллашрӗҫ те ҫамрӑксен «Ак парс» центрне ятарлӑ уява ҫул тытрӗҫ.

18 сехет ҫурӑра вара ятарлӑ концерт пуҫланчӗ — уява килнисене Чӑваш патшалӑх филармонийӗ ҫумӗнчи «Ҫавал» ансамбль чӑннипех те пысӑк шайри пултарулӑхпа савӑнтарчӗ. Концерт пынӑ май тӗрлӗ тӳре-шара «Сувар» хаҫата тата унта тӑрӑшакансене хисеп тата тав хучӗсемпе чысларӗ.

**«Сувар» хаҫат тухнӑранпа 20 ҫул ҫитнӗ ятпа эпир вӗсене саламлатпӑр, малашне те малта пыракан хаҫатсен шутӗнче пыма ӑнӑҫусем сунатпӑр!**

__http://fotki.yandex.ru/users/chuvashorg/album/156462/|**Сӑнсем**__ (358)