Хӗрлӗ Чутай районӗнче ватӑсене 90 е ытларах ҫул тултарнӑ ятпа Раҫҫей Президенчӗ ячӗпе саламлассине лайӑх йӗркеленӗ. Юбилярсене Кремльти ҫырӑва ҫитерсе парас тӗлӗшпе ытларах чухне район администраци пуҫлӑхӗ Александр Башкиров, социаллӑ хӳтлӗх пайӗн пуҫлӑхӗ Вера Ярабаева, ял тӑрӑх пуҫлӑхӗсем ҫитеҫҫӗ. Ватӑсен пурнӑҫӗпе интересленеҫҫӗ, уявпа саламласа асӑнмалӑх парнесем параҫҫӗ.

Ҫак кунсенче 90 ҫул тултарнӑ ятпа янӑ Владимр Путинӑн саламне __Хурапыр__ ялӗнче пурӑнакан Анастасия Горланова патне ҫитернӗ, __Калкасси__ ялӗнче пурӑнакан Анна Максимовна Ярадаева вара хӑйӗн 95 ҫулхи юбилейне кӗтсе илнӗ. Штанаш ял тӑрӑхӗнчи __Арайкассинче__ пурӑнакан Елена Ильинична Росскова та 90 ҫул тултарнӑ ятпа Раҫҫей Президентӗнчен, Владимир Путинран, саламлӑ Ҫыру илнӗ.

Салама район администраци пуҫлӑхӗ, районти социаллӑ хӳтлӗх пайӗн начальникӗ тата Штанаш ял тӑрӑхӗн пуҫлӑхӗ Светлана Ерофеева ҫитерсе юбиляра саламланӑ. Елена Росскова хальхи вӑхӑтра ывӑлӗпе, кинӗпе килӗштерсе пурӑнать, мӑнукӗсене пӑхма пулӑшнӑ, ачисемпе мӑнукӗсем ӑна манмаҫҫӗ. Ӗмӗр тӑршшӗпе колхозра тӑрӑшнӑ, вӑрҫӑ нушисене тӳссе ирттернӗ. Юбиляра саламлама унӑн кӳрши — ҫывӑх юлташӗ, ҫулла 95 ҫул тултаракан Александра Ильинична Алексеева та килнӗ. Елена Росскова ҫине пӑхсан вӑл 90 ҫул тултарнине пачах та ӗненес килменни пирки каланӑ: «Кашни кунпа савӑнса пурӑнмалла, шӳтлеме те пӗлмелле, тараватлӑх пирки манмалла мар, ырӑ малашлӑха шанмалла» — тенӗ вӑл йӑл кулса.