Кӑрлачӑн 27-мӗшӗнче республикӑра Чӑваш халӑх писателӗ, 1976-мӗш ҫултанпа Совет Союзӗнчи ҫыравҫӑсен ретӗнче тӑнӑ, Ҫемен Элкер ячӗллӗ преми лауреачӗ __Лаврентий Васильевич Таллеров__ ҫуралнӑранпа 85 ҫул тултарнине уявларӗҫ. Хӗрлӗ Чутай районӗнчи Штанаш салинчи ял вулавӑшӗнче паллӑ писательсемпе поэтсен юбилейӗсене халалласа яланах вӗсен кӗнекисенчен тӑракан выставкӑсем йӗркелеҫҫӗ, вулакансемпе тӗрлӗ мероприятисем ирттереҫҫӗ. Вулавӑшра тӑрӑшакан Надежда Павлова ял халӑхне, шкул ачисене вулавӑша килекен ҫӗнӗ кӗнекесемпе, тӗрлӗ хаҫат- журналпа паллаштарсах тӑрать: историллӗ материалсем тӑрӑх интереслӗ хӑтлавсем хатӗрлет, вырӑнти уявсене ирттерме сценарисем хатӗрлесе парать.

Лаврентий Таллеров юбилейӗ тӗлне те вулавӑшра унӑн кӗнекисен куравне йӗркелерӗҫ, «С любовью к простому человеку» (чӑв. «Ахаль ҫынна кӑмӑлласа») литература уявӗ ирттерчӗҫ. Надежда Павлова пухӑннисене ҫыравҫӑн кун-ҫулӗпе паллаштарчӗ, ыйтусем ҫине хуравларӗ. Юлашки ҫулсенче вырӑнти вулавӑш ҫыравҫӑн «Майра» тата «Шеремет» кӗнекисемпе пуянланнӑ, ку кӗнекесене халӑх уйрӑмах юратса вулать.

Ҫыравҫӑн «Подсолнух златоглавый», «Брезовый сок», «Суженый мой Салиме» кӗнекисене те халӑх кӑмӑллать.

Вырӑс писателӗ Павел Петрович Бажов 135 ҫул тултарнине халалласа та вулавӑшра вырӑнти шкул ачисемпе «Бажов юмахӗсем тӑрӑх» литература уявӗ ирттерчӗҫ. Ачасем ача-пӑча писателӗн пурнӑҫӗпе паллашрӗҫ, унтан вӑл хайланӑ юмахсем тӑрӑх ҫулҫӳреве тухрӗҫ. Викторина ыйтӑвӗсене хуравлассипе тӑваттӑмӗшсем уйрӑмах хастар пулчӗҫ.