Паян, ҫурлан 18-мӗшӗнче __Шупашкар__ хули хӑйӗн 544 ҫулхи ҫуралнӑ кунне паллӑ тӑвать. Ҫак куна уявлама республикӑн тӗп хулине пин-пин ҫын пуҫтарӑннӑ.

Унсӑр пуҫне паян Наци вулавӗшӗнче 14:00 сехетре регионсем хушшинчи общество организацийӗ «Чӑваш наци конгресӗ» лару ирттернӗ. Ларӑва пирӗн республикӑн элчисемсӗр пуҫне конгресс канашӗн Мари Эл, Пушкӑрт, Тутар республикисенчи, Мускавпа Питӗр хулисенчи, Самар, Чӗмпӗр, Чулхула, Тӗмен, Ӑремпур облаҫӗсенчи элчисем хутшӑннӑ.

Тӗпрен илсен ларура виҫӗ ыйту тавра сӑмахланӑ. Пӗррӗмӗш ыйту Чӑваш наци конгресӗн VIII съездне ирттерессипе ҫыхӑннӑ. Ку ыйтупа «Чӑваш наци конгресӗн» президенчӗ __Архипов Геннадий Николаевич__ тухса калаҫнӑ. Вӑл съезда юпан 25-27-мӗш кунсем хушшинче ирттерме сӗннӗ. Вара сасӑланӑ хыҫҫӑн ун шухӑшӗпе нумайӑшӗ килӗшнӗ.

Иккӗмӗш ыйтура сӑмах ҫитес съезда хутшӑнакан делегатсене суйлассипе норма ҫирӗплетесси ҫинчен пынӑ. «Чӑваш наци конгресӗн» президиум членӗ Краснов Михаил Николаевич ларӑва пухӑннӑ ҫынсене йышшӑннӑ нормӑпа паллаштарнӑ. Ҫапла вара юпа уйӑхӗнче ирттерме планланӑ съезда 386 делегат хутшӑнмалла, вӗсенчен тулашран — 111, ют ҫӗршывран — 15, Чӑваш Республикинчи муниципаллӑ районсемпе хула округӗсенчен тата учрежденийӗсемпе организацисенчен — 260 делегат.

Юлашкинчен Мӑн канаша хутшӑнакансем пӗр ыйтупа кӑна тухса калаҫмарӗҫ. Тухса калаҫакансем паянхи кунсенчи кӑткӑслӑ ыйтусем тавра сӑмахларӗҫ. Чи малтанах сӑмаха «Чӑваш наци конгресӗн» исполком председатӗлӗ Портнов Константин Петрович илчӗ. Хӑйӗн калаҫӑвӗнче вӑл чуна ыратаракан пулӑмсене хускатрӗ. Ҫитес съезд хӗрӳллӗ пулса иртемелли ҫинчен каларӗ.

Пӗтӗмӗшлӗ илсен лару самай дискуссилӗ иртрӗ. Ҫитес съезд мӗнлерех, хӑҫан иртмеллине ларура ҫирӗплетсе пачӗҫ пулин те йышӑнупа пурте килӗшсех каясшӑн пулмарӗҫ.

Тухса калаҫакансен хушшинче уйрӑмах Илья Арсентьевич Иванов журналистӑн чуна пырса тивӗкен доклачӗ итлекенсен кӑмӑлне кайрӗ. Вӑл хускатнӑ ыйтусем, проблемӑсем чӑннипех те пирӗн республикӑра ҫивӗччӗн тухса тӑраҫҫӗ. Ҫапах та залра Илья Иванов шухӑшӗсене сивлекеннисем те тупӑнчӗҫ. Пӗрисен шухӑшӗпе конгресс хӑйӗн ӗҫӗ-хӗлнӗ тивӗҫлипе пурнӑҫламаҫҫӗ, теприсем вара конгресс лайӑх ӗҫлет тесе ӗнентереҫҫӗ. Мӗн тӑвӑн ӗнтӗ, миҫӗ ҫын — ҫавӑн чухлӗ шухӑш.

Ҫапла вара паянхи ларура йышӑннӑ тӑрӑх Чӑваш наци конгресӗн VIII съезчӗ юпан 25–27-мӗшӗнче пулса иртӗ. Съездра вара Чӑваш наци конгресӗн ҫӗнӗ президентне суйлӗҫ. Тен ҫак улшӑнусем конгресшӑн чӑннипех те усӑллӑ пулӗҫ. Тен вара «Чӑваш наци когресӗ чӑваш халӑхшӑн тӑрӑшмасть» текенсен йышӗ чакса ларӗ.