Ҫак эрнере Чӑваш Ен Элтеперӗ __Михаил Игнатьев__ __Ҫӗмӗрле__ хулине ҫитсе килнӗ. Анчах савӑнмалли сахал пулнӑ унта. Республика ертӳҫи хула пуҫлӑхӗсене Правительствӑна кӑна шанса лармалла марри, хӑйсем тӗллӗн те яваплӑ утӑмсем тумалли пирки аса илтернӗ.

__Ҫӗмӗрлере__ шыв ыйтӑвӗ яланах ҫивӗч-мӗн. Асӑннӑ хулара пурӑнакансем республика Элтеперӗ нумаях пулмасть ҫынсен ыйтӑвӗсене тӑрӗ эфирта хуравланӑ чух та хӑйсен тӑрӑхӗнчи ҫивӗч самантсене хускатнӑ. Ӗҫ-пуҫпа Михаил Игнатьев хӑй паллашнӑ.

1990-мӗш ҫулта хута янӑ котельнӑй япӑхса кайнӑ. Ӑна тӗпрен юсаса ҫӗнетме ытла та хакла ларать-мӗн. Кунсӑр пуҫне муниципалитетӑн «Теплоэнерго» предприятийӗ газшӑн тата ҫутӑшӑн парӑм 150 миллион тенке яхӑн пухӑнса кайнӑ. Ытти хӑш-пӗр районта, ав, блоклӑ котельнӑйсем туса лартаҫҫӗ. Ӗҫӗ хӑвӑрт пулаканскер.

Лайӑххи пирки каласан, тӑлӑх ачасене, нумай ачаллӑ ҫемьесене тата ишӗлекен ҫурт-йӗрте пурӑнакансене хваттерсемпе тивӗҫтереҫҫӗ-мӗн-ха. Анчах кӑҫалхи ҫӗртмен 15-мӗшӗнче 16 хваттерлӗ ҫуртри пушар хыҫҫӑн хваттерсӗр юлнӑ ҫынсен ыйтӑвне татассипе йывӑрлӑх пур иккен. Ӑна юсас тесен 14 миллион тенкӗ таран кирлӗ-мӗн. Ҫурт муниципалитет харпӑрлӑхӗнче-мӗн. «Хӑвӑр харпӑрлӑхӑршӑн эсир хӑвӑр явап тытма тивӗҫ. Татӑклӑ йышӑнӑва та сирӗнех тумалла: ҫурта йӑлтах сӳтетӗр-и е ӑна юсатӑр-и. Унта пурӑннисен те хӑйсен шӑпине татса парассине хутшӑнмалла, такам туса парасса кӗтсе лармалла мар. Пушар хыҫҫӑнхи ҫӳп-ҫапа паян та тасатман», — палӑртнӑ Михаил Игнатьев.

Ҫӗмӗрлере пулнӑ май Михаил Васильевич ытти объекта та ҫитсе курнӑ. Унтан вӑл хула хастарӗсемпе канашлу ирттернӗ, ҫивӗч ыйтусене сӳтсе явнӑ.

__http://www.cap.ru/info.aspx?gov_id=712&type=main&id=2560757|**Сӑнсем**__ (28)