__Ҫӑварни__ — савӑнӑҫлӑ уяв, хӗле ӑсатса ҫуркуннене кӗтсе илни. Ӑна ҫурхи кунпа ҫӗр танлашнӑ вӑхӑтра паллӑ тунӑ. Ӗлӗк ҫӑварни кӗҫнерникун пуҫланнӑ, хӑш-пӗр ҫӗрте икӗ эрнене тӑсӑлнӑ. Пӗрремӗш эрни — Аслӑ Ҫӑварни, иккӗмӗшӗ — Кӗҫӗн Ҫӑварни. Христианлӑх сарӑлнӑ май чӑвашсен уявӗ вырӑссеннипе пӗрлешнӗ.

__Йӗпреҫ районӗнчи__ __Пучинкери__ вӑтам шкул вӗренекенӗсем пушӑн 7-мӗшӗнче Ҫӑварни уявне ирттерчӗҫ. Урамра кунӗпех ҫил-тӑман алхасрӗ пулин те, шкул ачисемпе вӗрентекенсем, ачасен ашшӗ-амӑшӗсем шкул картишне пуҫтарӑнчӗҫ. Cавӑнӑҫлӑ уява шкулти воспитани енӗпе ӗҫлекен директор ҫумӗ А.М.Максимовӑпа аслӑ вожатӑй Н.И.Шибаева йӗркелесе пычӗҫ.

Кашни класс ачисем сӗтел тулли апат-ҫимӗҫ лартса тултарнӑ. Ачасем хӑйсен ашшӗ-амӑшӗсемпе пӗрле кукӑль-пӳремеч, ҫуллӑ ҫатма икерчӗ хатӗрленӗ, вӗсен тутлӑ шӑрши сӑмсана кӑтӑклать. Кунтах сӑмаварсенче чей пӑсланать. Ачасем савӑнсах пӗр-пӗрне кӑна мар, хӑнасене те хӑналаҫҫӗ.

Уяв питӗ хаваслӑ та интереслӗ иртрӗ. Малтанах ачасем Ҫӑварни юррисем юрласа савӑнтарчӗҫ.

~~–И-и! Ҫӑварни, ҫӑварни!

Катӑк ҫатма икерчи

Эрне хушши ҫитерет~~, — янӑрарӗ шкул картишӗ.

Ун хыҫҫӑн вӑйӑсем пуҫланчӗҫ. Мӗнле кӑна вӑйӑ-кулӑ шутласа тупман-ши уява ертсе пыракансем! Ҫӑварни ҫуни капӑрлатасси, чи тулӑх сӗтел хатӗрлесси, ушкӑнсемпе ӑмартасси, вӗрен туртасси тата ытти тӗрлӗ вӑйӑ — вӗсенче ачасем хаваспах хутшӑнчеҫ.

Ачасене, паллах, капӑрлатса илемлетнӗ ҫунасемпе пӗр-пӗрне туртса чупни пуринчен те ытларах килӗшрӗ.

Уяв, яланхи пекех, улӑм катемпине чӗртсе ҫунтарнипе вӗҫленчӗ. Авалхи йӑлапа чир-чӗртен сывалма ҫунакан «Ҫӑварни карчӑкӗ» йӗри-тавра кашниех виҫӗ хутчен чупса ҫаврӑнма тӑрашрӗ. «Ҫӑварни карчӑкӗ! Тутлӑхлӑ пул, чипер кай! Чир-чӗре ялтан илсе кай!»