__Комсомольски районӗнче__ «Яланах — театр» ятпа драма кружокӗсен курав-конкурсӗ пырать. Ҫак тупӑшӑва __Вӑрманхӗрри Чурачӑк__ клубӗ ҫумӗнчи Е.Степанова ертсе пыракан драма кружокӗ те хӑпартлансах хатӗрленчӗ. Курава валли __Альбина Сухан__ драматургӑн «Пулӑ пуҫӗнчен ҫӗрет» пьеси тӑрӑх хатӗрлерӗҫ. Чи пирвайхи курава __Хырхӗрри__ культура ҫуртӗнче лартма шутларӗҫ. Палӑртнӑ вӑхӑта халӑх та пуҫтарӑнчӗ, районти ятарлӑ комисси членӗсем те килсе ҫитрӗҫ.

Шӑппӑн та пӗр тикӗссӗн чаршав икӗ еннелле уҫӑлчӗ. Ҫцена ҫинче пысӑк пуҫлӑхӑн пӳлӗмӗ, курӑмлӑ вырӑнта — президент сӑнӳкерчӗкӗ. Паллӑ пулчӗ — ӗҫ-пуҫ хальхи вӑхӑтра пулса иртет. Пуҫлӑхӗ хӑй те (ун сӑнарне Г.Бормотина питех те ӑста калӑпланӑ) сӗтел хушшинче хутсем уҫкаласа-пӑхкаласа тем шырать, куҫлӑхне шӑла-шӑла хутран-ситрен ҫыркалать, хӑйне мӑнаҫлӑн тыткалать. Чӑн та, пуҫлӑхсен пурнӑҫне пит аван пӗлсе кӑтартнӑ автор: паянхи кун хутсене вӑхӑтра тӗрӗс-тӗкел туса пырсан — эсӗ лайӑх ӗҫлетӗн, хут тума пӗлеймерӗн, е ерҫеймерӗн — начаррисен шутне кӗртсе хураҫҫӗ. Пуҫлӑхсене питлени ҫеҫ мар, пурнӑҫри ытти кӑлтӑк-мӑкӑлтӑка та пит аван сӑнласа пачӗҫ ялти артистсем. Эрех-сӑрапа иртӗшни, пирус сӗрӗмӗпе чыхӑнни, наркотиксемпе ҫыхланни ырри патне илсе ҫитерменнине пурте чухлатпӑр вӗт ӗнтӗ. Арҫынсемпе хӗрарӑмсем хушшинчи ҫыхӑнусене ирӗке яни те пуҫа кастарать. Ҫӗршывӑмӑрти чылай ял-хуласенчи кил-ҫурт е ытти объектсене тӑвасси вӑраха кайнӑ тӗслӗхсене те (вырӑссем ҫак пулӑма валли питех те вӑхӑтлӑ «долгосторой» сӑмах шыраса тупнӑ) питлеме манмарӗҫ. Ҫак пулӑмсене эпир яра кун тенӗ пекех куратпӑр, анчах чылай чухне айккинчен иртсе каятпӑр. Пурте пӗлекен киревсӗр пулӑмсем ҫинчен культура ҫуртӗнче яр-уҫҫӑн калани вара пурне те тепӗр хут шухӑша ячӗ.

Артистен ячӗсене те асӑнмасӑр хӑварас килмест. Сӑмахсене вӗренсе, хӑйсене пӗлсе тыткаласа ял ҫыннисен умне тӗрлӗ ҫӗрте вӑй хуракан Е.Степанова, Г.Бормотина, С.Белкова, М.Белкова, Ф.Кополухина, А.Пушкина, Л.Ятманова, М.Ятманова, Н.Хлебникова тухрӗҫ. Тӗлӗнмелле: арҫын ролӗсене те хӑйсемех калӑпласа пачӗҫ. Ахальтен каламан ӗнтӗ халӑхра: «ӳркенмен — ӑста», — тесе.

«Ятарласа вӗреннӗ артистсенчен пӗртте кая мар… Питех те лайӑх вылярӗҫ хӗрсем хӑйсен ролӗсене… Сӑнарӗсене те кашни хӑйнеевӗрлӗ калӑпланӑ… Ытти ялсене кайса кӑтартмалла ҫак спектакле…», — тени илтӗнчӗ халӑх хушшинче килсене саланнӑ май. Жюри те артистене лайӑх хак парасси куҫкӗрет.