Элтепӗрӗн пресс-служби пӗлтернӗ тӑрӑх ӗнер __Михаил Игнатьев__ канашлу ирттернӗ. Унта хуласене шывпа тивӗҫтерес ыйтӑва сӳтсе явнӑ. Уйрӑмах __Шупашкарпа__ __Ҫӗнӗ Шупашкар__ хулисем ҫинче чарӑнса тӑнӑ. __Алексей Ладыковпа__ __Александр Сироткин__ пӗлтернӗ тӑрӑх Ҫӗнӗ Ҫул вӑхӑтӗнче те шывпа тивӗҫтересси лайӑх ӗҫленӗ. __Шупашкарпа__ __Етӗрнере__ ҫеҫ кӑрлачӑн 1-мӗшӗн каҫхине пӑтармахсем сиксе тухнӑ, анчах вӗсене тепӗр куннех юсама пултарнӑ.

Элтепӗр ҫак кун «Чӑваш Республикинчи шывпа тивӗҫтерессипе шыва ҫитерессине аталантармалли хушма ӗҫсем ҫинчен» саккуна алӑ пуснӑ иккен. Унпа килӗшӳллӗн __Ҫӗнӗ Шупашкарпа__ __Шупашкарӑн__ шывпа тивӗҫтерекен системӑсене пӗрлештересшӗн пулас. Чи малтанах __Ҫӗнӗ Шупашкарти__ «Биологические очистные сооружения» предприятипе «Ҫӗнӗ Шупашкар хулин комуналлӑ сечӗсем» предприятие акционерлама палӑртнӑ. Ун хыҫҫӑн вара вӗсене __Шупашкарти__ «Водоканал» АУО-па пӗрлештермелле. Министрсен Кабинечӗн председателӗ __Иван Моторин__ хӑйӗн сӑмахӗнче ку ӗҫе тӑвасси пирки тахҫанах шухӑшлани пирки пӗлтерчӗ. Ҫӗнӗ хулана ҫӗклеме пуҫланӑ хыҫҫӑн ыйту тата та вӑйлӑрах ҫивӗленнӗ иккен.