Паян — илемлӗ ылтӑн кӗр кунӗ. Йӗри-таврана тимлӗн сӑнаса пӑхсан ҫак илеме ҫутҫанталӑкран лайӑхрах нимӗнле художник та сӑнласа кӑтартайманнине туятӑн. Пысӑк ҫулӑн икӗ енӗпе ӳсекен йывӑҫсен тӗрлӗ тӗслӗ тумӗсемпе киленсе __Хырхӗрри__ тӗп шкулӗнче вӗренекенсем __Шупашкара__ ҫул тытрӗҫ. Икӗ сехетрен паллӑ ентеш — __Василий Иванович Чапаев__ палӑкӗ патне ҫитрӗҫ. Ҫӳллӗ постамент ҫинче вырнаҫтарнӑ мӑнаҫлӑ юланутҫӑ ҫине пуҫсене каҫӑртсах тимлерӗҫ шӑпӑрлансем. Часах музейе те кӗрсе курчӗҫ. Кунта вырнаҫтарнӑ экспонатсем хушшинче вӗсене ытларах граждан вӑрҫи вӑхӑтӗнчи салтаксен тумтирӗ тата хӗҫ-пӑшал кӑткӑслантарчӗ. Легендарлӑ ҫар пуҫӗ ҫуралса ӳснӗ ҫурта та хаваспах кӗрсе тухрӗҫ ачасем.

Малалла ҫул — __Сӗнтӗрвӑрри районӗнчи__ Шуршӑл ялӗнче вырнаҫнӑ Космонавтика мемориаллӑ комплексне. Ҫур сехетрен палӑртнӑ вырӑна ҫитсе те тӑчӗҫ ачасем. Тепӗр паллӑ ентеш — __Андриян Григорьевич Николаев__ виҫҫӗмӗш космонавтӑн пурнӑҫӗпе тата ӗҫӗ-хӗлӗпе паллашрӗҫ. Экскурсовод каланине тимлесе итлерӗҫ, итлерӗҫ ҫеҫ те мар, ыйтусене тӗрӗс хуравсем парса парнесене те тивӗҫрӗҫ. Уйрӑмах 4-мӗш класра вӗренекен Ирина Иванова тата 2-мӗш класри Лариса Малышева маттур пулчӗҫ. Чи тӗлӗнмелли, асра юлмалли — космонавтсен тумтирӗсем, тӗнче уҫлӑхне парӑнтарнӑ карап, тата паллӑ ентеше вӗҫев хыҫҫӑн __Шупашкарта__ кӗтсе илнӗ ултӑ метр тӑршшӗ ЗИС автомобиль. Ытти экспонатсем те калама ҫук интереслӗ. Ҫӗкленӳллӗ кӑмӑлпа ачасемпе вӗсен класс ертӳҫисем килелле васкарӗҫ. Куҫ умӗнче вара — музейсенче курни-илтни. Харпӑр хӑй куҫпа курнине мӗн ҫиттӗр ӗнтӗ, ӗмӗрлӗхе асра юлаҫҫӗ ҫакӑн пек самантсем.