2011 ҫул Красноармейски тӑрӑхӗнче пурӑнакансемшӗн паллӑ тапхӑр пулчӗ. Иртсе кайнӑ ҫулталӑка пирӗн сумлӑ ентешӗмӗре, __Мӑн Шетмӗре__ ҫуралса ӳснӗ пӗртен пӗр Совет Союзӗн Паттӑрне __Владимир Васильевич Васильева__ халалларӗҫ. Ҫак паллӑ датӑна хисеп туса паллӑ журналист, Трак енри таврапӗлӳҫӗсен обществин ертӳҫи, ЧР халӑх академикӗ, Н. Янкас тата М. Тинехпи ячӗллӗ премисен лауреачӗ В. З. Константинов «Кладезь здоровья и патриотизма» ятлӑ кӗнекене вулакан патне ҫитерчӗ. Ку авторӑн тӑххӑрмӗш кӗнеки пулчӗ.

Вулакана пӗлме. В.В. Васильев 1911 ҫулхи утӑн 11-мӗшӗнче (ҫӗнӗ стильпе) __Мӑн Шетмӗ__ ялӗнче ҫуралнӑ. Владимир Васильевич хӑйӗн кун-ҫулӗн виҫҫӗмӗш пайне ҫеҫ пурӑнса ирттернӗ. Унӑн малашнехи шӑпине Тӑван Ҫӗршывӑн Аслӑ вӑрҫӑ татса панӑ. Тӑван ҫӗршывӑн ирӗклӗхӗшӗн кӗрешсе В. Васильев паттӑрлӑх кӑтартнӑ. Одер юханшывӗ хӗрринчи тытса илнӗ плацдарма хӳтӗлесе пирӗн ентеш чылай фашиста тӗп тунӑ. Нумай хутчен аманнӑ пулин те, палӑртнӑ позицирен пӗр хутчен те чакман. Хӑйӗн калама ҫук паттӑр вилӗмӗпе вуншар салтакӑн пурнӑҫне сыхласа хӑварнӑ. Одер ҫинчи 1945 ҫулхи кӑрлачри паттӑрлӑхшӑн В.В. Васильева ҫӗршывӑн чи пысӑк наградипе чысланӑ.

В. Васильев хӑй ҫуралса ӳснӗ __Мӑн Шетмӗ__ енчен иккӗмӗш тӗнче вӑрҫи пуҫланас умӗн Чулхула хулине куҫса кайса тӗпленнӗ. Хӑй вӑл енче ҫуралса ӳснӗ май В. Константинов паттӑр ҫинчен тӑтӑшах материалсем пухма пуҫланӑ, ӗҫе вӗҫне ҫитернӗ темелле.

Хулӑн хуплашкаллӑ кӗнеке 238 страницӑран тӑрать. Кунта автор мухтавлӑ ентешӗмӗр «Хӑҫан ҫуралнӑ-вилнӗ, Тӑван ҫӗршывӑн Аслӑ вӑрҫине ӑҫтан кайнӑ, ӑна ӑҫта пытарнӑ?» ыйтусене тӗплӗн татса парать.

Вӑл кӗнекере ҫирӗп шухӑшлӑ та пысӑк тавра курӑмлӑ командир шутланнӑ ентеш кун-ҫулне тӗплӗн тишкернӗ тата ҫутатнӑ. Юлашкинчен ҫакна палӑртмалла. Вислӑпа Одер, Сандомирпа Силези тапӑну операцийӗсенче корпус юланутҫисем уйрӑмах хӑюлӑхпа палӑрнӑ. СССР Аслӑ Канашӗн Президиумӗн Указӗпе килӗшӳллӗн 1 гварди кавалери корпусӗнчи 18 ҫынна Совет Союзӗн Паттӑрӗ ятне панӑ. Вӗсем хушшинче пӗрремӗш гварди юланутҫи Владимир Васильев та.

Кӗнеке аван чӗлхепе вуланать.

В. Васильев пурнӑҫӗн чылай тапхӑрне Чулхула тӑрӑхӗнче ирттернӗ май хӑнасене парне тума кӗнекен ҫуррине вырӑсла текстпа хатӗрленӗ. Кунта пӗлмелли, вуламалли сахал мар.

«Кладезь здоровья и патриотизма» кӗнекене Шупашкарти «Ҫӗнӗ вӑхӑт» типографинче 1000 экземплярпа пичетленӗ. Унта сӑнӳкерчӗксем чылай. Ӑна __Красноармейскинчи__ «Ял пурнӑҫӗ» хаҫат редакцийӗнче туянма пулать.