«Асран кайми» ятпа вулакан аллине ҫӗнӗ кӗнеке ҫитрӗ. Авторӗсем — Г. Е. Дубровпа Ю. А. Перепелкин 60 ытларах страницӑллӑ ку ӗҫе __Патăрьел районĕнчи|Патӑрьел районӗнчи__ Туҫа ял ӗҫченӗсене сума суса хатӗрленӗ. Ум сӑмахра (ӑна Раҫҫей Федерацийӗн Журналистсен перлӗхӗн пайташӗ Гурий Дубров хатӗрленӗ) шӑпах унӑн историне кӗрсе юлнӑ паллӑ вырӑнсем, йӑх-тымарсем пирки ҫырса кӑтартнӑ.

Асӑннӑ кӗнеке виҫӗ тӗп пайран тӑрать. Пӗрремӗшӗ «Туҫара — хӑнара» ятлӑ. Унта 2002 ҫулхи нарӑсӑн 23-мӗшӗнче __Красноармейскинчи__ «Трак ен» халӑх фольклор ушкӑнӗ (ертӳҫи — Н. Янкас премийӗн лауреачӗ Н. М. Никоноров) __Анат Туçана|Анат Туҫана__ пысӑк концерт программипе ҫитсе килни ҫинчен туллин каласа панӑ. Ку ял — кӗнеке авторӗсенчен пӗрин, Юрий Анатольевич Перепелкинӑн — тӑван ялӗ. Унӑн аслашшӗ, Илларион Евдокимович — Социализмла Ӗҫ Геройӗ, ашшӗ, Анатолий Илларионович — Ленин орденне тивӗҫнӗ. Курав залӗнче халӑх лӑк тулли пулнӑ, красноармейскисен концертне ҫынсем пысӑк хак панӑ.

Иккӗмӗш пайӗ — «Аслисене асра тытса» ятлӑ. Вӑл хӑй тата пӗчӗкрех виҫӗ сыпӑкран тӑрать: «Шкул музейӗнче», «Асӑну хӑми уҫни» тата «Палӑк лартни». Кунта сӑмах 2003 ҫулта шкулӑн пысӑк залӗнче Путенесен йӑх уявӗ хыҫҫӑн Социализмла Ӗҫ Геройне И. Е. Перепелкина халалласа __Красноармейскинчи__ Н. А. Иванов скульптор ӑсталанӑ бюста шкул музейне парнелени, Паттӑр ячӗпе Асӑну хӑми уҫни, ӑна сума суса палӑк лартни ҫинчен пырать.

Виҫҫӗмӗш пайӗ — «Ирхи тӗпел» телекӑларӑм» ятпа вулакан патне ҫитнӗ. __Марина Карягина__ тележурналист хатӗрлекен «Ирхи тӗпел» телекӑларӑма 2010 ҫулхи авӑнӑн 18-мӗшӗнче Юрий Анатольевичпа Николай Алексеевич Перепелкинсене чӗннӗ. Унта Патӑрьел тӑрӑхӗнчи паттӑр та мухтавлӑ ҫынсем пиркиех калаҫу пырать. Анат Туҫара Паттӑр йӑхсем чӑннипех те йышлӑ: Перепелкинсем, Кузнецовсем, Барановсем, Заплаткинсем, Плешковсем, Долговсем, Маршевсем тата ыттисем те.

Кӗнекене кунсӑр пуҫне тӗрлӗ тӗслӗ чылай сӑнӳкерчӗкпе пуянлатнӑ. Красноармейски районӗнчи «Ял пурнӑҫӗ» хаҫатӑн тӗп редакторӗ И. А. Прокопьев редакцилесе кӑларнӑскере, __Шупашкарти__ «Ҫӗнӗ Вӑхӑт» типографире 200 экземпляр тиражпа пичетленӗ. Ҫапла вара ҫак кунсенче таврапӗлӳҫӗсем валли питӗ кирлӗ те усӑллӑ кӗнеке «пиҫсе тухнӑ».