Хӗрлӗ Чутайра хӗрӗнкӗ хӗрарӑм полицейскисенчен тарма хӑтланнӑ.
Вӑл руль умӗнче ларнӑ чухне машинӑна итлеттереймен – йывӑҫа пырса ҫапӑннӑ. Ку каҫхине пулнӑ. Салонра унӑн 9 уйӑхри ачи те ларнӑ.
Хайхи хӗрарӑм машинине, ачине пӑрахса хӑварса тарма хӑтланнӑ. Анчах ӑна йӗрке хуралҫисем хӑваласа ҫитнӗ, ун тӗлӗшпе административлӑ протокол ҫырнӑ. Хӗрарӑм пирки опека органне те пӗлтернӗ.
Вӑрнарта пурӑнакансем такам пӑшалтан пенӗ сасса илтнӗ те кун пирки полицие пӗлтернӗ. Вӗсем пӑшал евӗр япала йӑтнӑ арҫынна та курнӑ.
Вырӑна полицейскисем тата район прокурорӗ ҫитнӗ. Пӑшаллӑ арҫын вара алӑка уҫма хирӗҫленӗ. Ҫавӑнпа йӗрке хуралҫисем ҫурта чӳрече урлӑ кӗрсе арҫыннӑн пӑшалне туртса илнӗ.
Перекенни – Хусанти 42 ҫулти арҫын, вӑл больницӑра шутра тӑрать. Халӗ тӗрӗслев пырать. Ӑна район прокурорӗ хӑй тӗрӗслесе тӑрать.
Ҫак кунсенче «Ҫулталӑкри инспектора» палӑртнӑ. ШӖМӗн Шупашкарти управленийӗн ҫул-йӗрпе патрулӗн уйрӑм батальонӗн аслӑ инспекторӗ Сергей Николаев тивӗҫнӗ.
Вӑл шалти ӗҫсен органӗсенче 6 ҫул ӗҫлет. Пӗлтӗр вӑл ӳсӗр тата правсӑр 100 ытла водителе тытса чарнӑ. Ҫапла вӑл миҫе ҫынна инкекрен ҫӑлнӑ.
Ҫӗнтерӳҫӗ кубокне ӑна ЧР ШӖМӗн ертӳҫи Виктор Шметков панӑ.
Ӗнер кӑнтӑрла Елчӗкре пӗр хӗрарӑм 34-ри ывӑлӗ хӑйне килпетсӗр тытни, вӗлерессипе хӑратни пирки полицие пӗлтернӗ. Арҫын – унччен судпа айӑпланнӑскер.
Полици вырӑна ҫитнӗ. Район прокурорӗ Александр Кудряшов та унта пынӑ. Йӗрке хуралҫисене курсан арҫын пушшех те урса кайнӑ, ҫӗҫӗпе, пӑшал евӗр япаласемпе хӑратма тытӑннӑ.
Полицейскисем унпа 2 сехет калаҫнӑ, лӑпланма ыйтнӑ. Ун хыҫҫӑн ӑна тытса чарайнӑ. Халӗ тӗрӗслев пырать, пуҫиле ӗҫ пуҫарасси пирки шутлаҫҫӗ.
Сӗнтӗрвӑрри округӗнчи полицейскисем вӑрманта ҫухалса кайнӑ арҫынна киле ҫитме пулӑшнӑ.
Кӑрлачӑн 5-мӗшӗнче Шупашкарти хӗрарӑм полицие шӑнкӑрааласа 36 ҫулти упӑшки лесник патне хӑнана кайма тухсан ҫухалса кайнине пӗлтӗрнӗ. Лешӗ кун пирки шӑнкӑравласа калама ӗлкӗрнӗ, кайран телефонӗ сӳнсе ларнӑ.
Полици капитанӗ Григорий Шестаков тата полици майорӗ Юрий Павлов вӑрмана ҫитнӗ те арҫынна, йӗрӗ тӑрӑх шырама пуҫланӑ. 10 ҫухрӑм утнӑ вӗсем. Юлашкинчен утарти сарай патне пырса тухнӑ. Ҫӳхерех тӑхӑннӑ арҫын унта пытаннӑ. Полицейскисем ӑна вӑрмантан тухма пулӑшнӑ.
Кӑҫал пӗррӗмӗш пушар Вӑрнар поселокӗнче пулнӑ.
Паян ирхи 5 сехет иртсен вӑхӑтлӑх тытмалли изолятор ӗҫченӗсем Дмитрий Якушин тата Евгений Игнатьев патруль вӑхӑтӗнче Жуков урамӗнчи ҫуртра тӗтӗм йӑсӑрланнине асӑрханӑ. Вӗсем кил хуҫисене чӳречерен шаккаса вӑратнӑ. 36-ри кил хунҫине, унӑн 34-ри мӑшӑрне, вӗсен 3-ри ачине, арҫыннӑн ашшӗ-амӑшне чӳречерен тухма пулӑшнӑ.
Вӗсем мунча хутнӑ пулнӑ иккен. Анчах юсавсӑр мӑрьене пула пушар тухнӑ. Тимӗр тӑрӑ айӗнче ҫулӑм курӑнман, анчах вӑл пӳрт патнелле ҫывхарма пуҫланӑ.
Пушара 3 сехетрен сӳнтернӗ.
Ҫӗрпӳре каҫхине ҫул-йӗрпе патруль служби шӑнса кӳтнӗ кинемее асӑрханӑ. Вӑл ҫӳхе тӑхӑннӑ, килӗ ӑҫтине манса кайнӑ.
Полицейскисем 86 ҫулти кинемее часрах машинӑна лартнӑ. Ватӑскер хӑй ӑҫта пурӑннине манса кайнӑ иккен. Йӗрке хуралҫисем вӑл ӑҫта пурӑннине хӑвӑртах палӑртнӑ. Вӗсем ӑна киле илсе ҫитернӗ. Тӑванӗсем савӑнса кайнӑ, полицейскисене тав тунӑ.
Республикӑри йӗрке хуралҫисем «Хӗл мучи полицейски» акцие хутшӑнаҫҫӗ. Нумаях пулмасть вӗсем светофор симӗс ҫутнӑ вӑхӑтра ҫул урлӑ каҫнӑ чухне автобус айне ҫакланнӑ арҫын ача патне саламлама кайнӑ. Телее, вӑл аварире хытах аманман.
Полицейскисем ӑна шкултан кӗтсе илнӗ, пылак парнепе савӑнтарнӑ, вылямалли полици машини тата паттӑрсем пирки ҫырнӑ кӗнеке панӑ.
Чӳк уйӑхӗн 27-мӗшӗнче Пӑрачкавра арҫын ҫухалнӑ. Вӑл ӑс-тӑнӗ арпашӑннипе те аптӑранӑ.
Арҫын – кӳршӗ регионтан, Пӑрачкава вӑл тӑванӗсем патне хӑнана килнӗ. Арӑмӗпе упӑшки урамра уҫӑлса ҫӳренӗ чухне ку каҫхине ҫухалнӑ. Хӑйӗнпе пӗрле телефон та илмен.
Арҫынна нимеҫӗсем, полицейскисем, «Лиза Алерт» отряд хастарӗсем шыранӑ. Тепӗр кунхине Николай Ефимов участковӑй ҫырманалла каякан йӗре курнӑ. Ҫапла ҫухалнӑскере тупнӑ. Вӑл шӑнса хытнӑ, хӑй тӗллӗн утайман та. Кӗҫех васкавлӑ медпулӑшу ҫитнӗ.
Канаш округӗнчи участковӑй Сергей Ипатьев республика шайӗнчи «Халӑх участковӑйӗ» конкурсра ҫӗнтерсе Чӑваш Ен чысне Раҫҫей шайӗнче хӳтӗленӗ. Вӑл 954 сасӑ пухса 47-мӗш вырӑн йышӑннӑ. Пӗрремӗш вырӑна Белгород облаҫӗнчи Сергей Наумов участковӑй тухнӑ.
Сергей Ипатьева вара, республика шайӗнче 4 хут ҫӗнтернӗскере, кӗҫех ҫӗнӗ служба машини – «Нива Тревел» – парӗҫ.
+0.3 °C