Пирĕшти

Шыв хĕррипе пыраттăм,

Шыва кĕме каяттăм.

Арман патне çитсессĕн

Йывăç тĕми хумханчĕ —

Пирĕшти сăнĕ курăнчĕ.

Пăхрĕ илчĕ ман çине —

Ирĕлтерчĕ чĕрене.

Эпĕ пăхрăм çаврăнса.

Курчĕ — тути йăл кулчĕ,

Йывăç ăшне пытанчĕ...

Çăвĕ иртрĕ, кĕр çитрĕ —

Пирĕшти асран каймарĕ:

Çавра ура, шурă кĕпе,

Пан улми пек пит çăмарти,

Чие çырли пек тути;

Ункăн-ункăн хура çӳç,

Пĕлĕт тĕслĕ кăвак куç,

Вăлта хулли кĕлетки —

Мана канлĕх памаççĕ,

Арман еннех туртаççĕ.

Çĕнĕ комментари хуш