Электронлă вулавăш

Кантăкланнă кăвак куçунтан

Шаккасан та тухмарĕ куççуль...

Пăрланса ларасран сар çуртам

Ăшăтсаччĕ ăна миçе çул!..

...Ăшăмри ăшшăмпа ăшăрха —

Шанчăкна кăларатăп тӳрре!

Тутăхман — çаплипех — тăтăрха.

Пĕр тумлам кăларсамччĕ: пĕрре!

Савнăçпа сăрламашкăн сăнна

Ирĕк пар яланхи йăлапа:

Пирĕнтен кам хуçа, кам хăна

Ӳлĕмрен татса парĕ шăпа.

Пиркепе пăралатăп пăрна:

Кăмăлна хытарма пăрахан!..

Шăтарсан шевлемпе кăкăрна

Пур-пĕрех пулăн ман — тапĕ тан!..

Тапĕ тан — тайăнна тавăрсан:

Ейӳлле сарăлсан туйăму,

Сыпкăншар сыпнипе хунасан

Нихăçан парăнман хăрхăму.

Пытарса пурнакан пăлхавна

Çиеле кăларатăп пĕрех!

Ан хĕрхен-ха — ыйтатăп — хăвна:

Эс хытман-ха, вилмен-ха, чĕрех!

Кантăкланнă кăвак куçунтан

Ывăнмасăр шаккатăп каллех...

Çăхавсен йăлхахне çурмаран

Çурса тăкĕ тасалăх халех!..

...Тан тапать?!.. Тан тапать! Таппăмпа

Танлашса хăвалать сулăмне

Чĕм кĕртсе ĕмĕте, çулăмпа

Хĕллене çĕнтерет çуркунне.