«Ку пĕве çитсе те хĕршĕн...»

Ку пĕве çитсе те хĕршĕн

Эп урам тăршши виçмен.

Куртăм та сана эп темшĕн

Çунтăм. Сисрĕн-и?

— Сисмен...

Ир-ирех, килет çеç шуçăм,

Эп тухаттăм акана.

Сан çинчен каймарĕ куçăм.

Сисрĕн пулĕ?

— Кăшт кăна...

Халăхпа эп утă çултăм,

Ман паккусăм тикĕсчĕ.

Сан çине пăхса йăл култăм.

Сисрĕн пулĕ?

— Сиснĕччĕ..

Тулă хӳхĕм ӳсрĕ, выртăм.

Халь кĕретĕп авăна.

Юратса сана эп ыртăм.

Сисрĕн пулĕ?

— Аванах...

Пичкене сăра та тулĕ

Туй тумашкăн кĕр çитсен.

Юратни сан урăх пулĕ?

Каласамччĕ?

— Çук, сисмен...

Çĕнĕ комментари хуш