Электронлă вулавăш

Салху ларать кйвелнĕ çуртăм,

Кичемлĕх унăн ăшĕнче.

Хăпать майпен хуралнă шур тăм,

Тусан, çӳп-çап урайĕнче.

Ав кĕтесре çатма аврийĕ,

Пĕр енĕ хуçăлнă ухват,

Хуçи вĕсен — анне — Мария —

Çынсемшĕн пулчĕ тарават.

Ирех ĕне сусан васкатчĕ

Çум çумлама колхоз хирне.

Ĕçрен килсен кĕпе çăватчĕ,

Сыхла пĕлместчĕ çав хăйне.

Урай сĕрме вăл вĕрентетчĕ

Пире хăй татнă шăланпа.

Таса çусассăн хĕпĕртетчĕ,

Кăштах мухтатчĕ çавăнпа.

— Анне! — тесе халь ман чĕнесчĕ,

Анчах, кам илтĕ-ши мана?

Анне çумне ларса йĕресчĕ

Пĕр сасăсăр кана-кана.

Кăштах ун чух, тен, чунăм канĕ

Ăшран «сив чирĕ» тасалсан.

Пур ырату ванса арканĕ

Çумра тăван анне ларсан.

Çук çав, пуш-пушă халĕ çуртăм

Карать карта, ав, эрешмен.

Хăпать майпен хуралнă шур тăм

Вăл хăпасса анне пĕлмен.