«Çĕршыва тĕссем çине ан пайлăр...»

Вячеслав Круглов | Сăвă | 1993 | 532


Çĕршыва тĕссем çине ан пайлăр,

Çитĕ пĕр-пĕрне тӳпелесе…

Пурăнар-и çĕр çинче сăпайлă

Тĕнчене чунпа илемлетсе.

Вучахра çеç çунтăр вут хĕлхемĕ.

Хирĕçӳ кăварĕ алхассан,

Никама та ун сăнни хĕрхенмĕ

Сар куна пĕр шелсĕр шуйхатсан.

Ыррине ăна — ĕçпе туптаççĕ,

Çилармань лартмаççĕ сăмахпа.

Ыр çынсем-и? Килĕшӳ тупаççĕ

Вут чĕртме çĕкленнĕ ухмахпа.

Тĕлĕнетĕп эп паян, çынсемĕр!

Чан çапатăп, итлĕр чун сасси.

Эп сĕнни çынсем патне çитсемĕр:

Телейпе çеç çиçтĕр пуласси.

Ман çĕршывăн тĕсĕ çутăран, —

Çук, çĕнеймĕ Сар куна тăхлан!

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: