«Хура тунсăх пуссан, аллăмсем усăнсан...»

Зинаида Сурпан | Сăвă | 615


Хура тунсăх пуссан, аллăмсем усăнсан,

Кил-çурта пăрахса, уй-хиртен уйрăлса

Инçете-инçете, çут тĕнчемĕр хĕрне

Ман тарассăм килет хăш чухне.

 

Илĕртмест çĕнĕ кун, пушанать сӳннĕ чун,

Курăнмасть çул умра, эп çын мар — чунсăр чул.

Вăйăм çук, вăйăм çук куçăма та уçма.

Кăмăл çук, халăм çук тĕнчере пурăнма.

 

Эп манатăп хама, туйăма çухатса,

Чĕр виле пек пулса пурăнап шăпланса.

Курăнатăп — пăхсан, эпĕ пур çĕр çинче.

Те этем, те мĕлке çак хура кунсенче.

 

Пурпĕрех çĕкленсе яр! уçатăп куçа.

Кĕлтăватăп Турра кĕтсе шурăм пуçа.

Çĕрмĕш хут çĕнĕрен эп чĕртетеп вучах,

Çĕрмĕш хут йăлăнатăп: «Ан сӳнтĕр анчах!»

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: