Чĕрĕлĕх

Василий Кервен | Сăвă | 632


...Шăнкăр-шăнкăр шыв юхать.

Шыв юхать те — чул юлать.

Шухăшлăр-ха, тăвансем:

Ĕмĕр иртет — кун юлать...

Халăх юрринчен

 

Ярать çак юрă тарăн шухăша,

Çыран пекех: каçас — ăçта кĕперĕ?

Пăлханчăк туйăм шăнăçмасть ăша,

Чун иккĕлле — лăпланчĕ те кĕрлерĕ.

 

Кунсем иртни кулянтармасть мана,

Этем ăс-халĕ вăрăм ĕмĕр пачĕ:

Вилни те ырă суннă ырана,

Эппин малашлăх — чĕрĕлĕх хăвачĕ.

 

Мала кайсамччĕ, Пурнăç, Çĕр çинче

Таса шыв юхнă евĕр шăнкăр-шăнкăр.

Чи чурăс чунсене пула тĕнче

Пĕр вырăнта чул пек хытса ан шăнтăр.

 

Телей — чипер кунсем юлас пурри,

Пулмасть никам та вилĕмĕн хурри.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: