«Эпир иккĕн çума-çумăн...»

Виталий Станьял | Сăвă | 381


Эпир иккĕн çума-çумăн

Килнине курнă пекех

Çул çинчи хуралçă хурăн

Пурçăнлă пуçне пĕкет.

 

Те кĕтсе чунĕ вăрканă,

Те илесшĕн хăтăрса,

Те пĕрле курма ăмсаннă,

Те ярасшăн уйăрса.

 

Тĕлпулу пĕриншĕн хурлă,

Тепĕрне телей кăна,

Сахал мар-тăр хурăн курнă

Килекен каякана.

 

Пĕрле чух пире те курчĕ,

Те ятлать вăл, те пиллет.

Тем калас сăмахĕ пурччĕ —

Пурçăнлă пуçне силлет.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: