Электронлă вулавăш

— Мĕнле пурăнатăн, чĕрем?

Санпа тахçанах калаçман.

Пĕлетĕн — куна та çĕре

Ĕçре ирттеретĕп ялан.

Асаплă-и эс? Ан пытар.

Хаваслă-и эс? Савăнтар.

— Çунатăп хитре саманан

Тĕпренчĕкĕ пулччĕ тесе.

Эс тунă тупа, эп манман

Çĕршыв çулăма кĕмессе.

Юрат юратма пулнине,

Ылхан ылхана юлнине.

— Чĕрем, кăвакарчĕ тăнлав,

Умри çул вара кĕске мар.

Канма хистесе ан йĕнла —

Çунат хальлĕхе усăнман.

Енчен тв ӳкес-мĕн пулсан,

Тăмашкăн хал çитĕ-и сан?

— Эп канлĕх ыйтмастăп санран,

Суйма, шахвăртма вĕренмен.

Хăвна шаннă евĕр эс шан,

Хăвна та, мана та ĕнен.

Ыр ĕçшĕн кăна çунатлан,

Ыр чунлă çынна ынатла.

— Чĕремçĕм, хур кайăк çулне

Утса тухасах килет ман.

Пĕлетĕп, зс ĕмĕт умне

Нихçан та тĕкме хăпартман.

Хавшамĕ-и ĕмĕт-çунат,

Пăрахмĕ-и вăл хуçуна?

— Çунсан самана вучĕпе,

Умра — çĕнĕ кун, сĕм кай мар.

Курма пĕл ача куçĕпе,

Ват çын чĕлхипе калаçма.

Никам тĕлĕнмест тĕк, пĕрех

Эс тĕлĕн тĕнче хитререн.