Ылтăн сăрăпала сăрламашкăн пуçларĕ...

Ылтăн сăрăпала сăрламашкăн пуçларĕ

ман умри шур хута тараватлă хĕвел.

Уçăлать пек ăшчик: йывăр тунсăх, шĕвел!

Сан пăрна шарт! çурса, халь утать сăвă çарĕ.

Çыхăн, ылтăн кĕлте, хывăн, ылтăн çĕмел:

йăлкăшинччĕ пĕрмай ĕçлĕ кăмăл кăварĕ.

Чĕрере çуркунне ахальтен-им юрларĕ?

Ĕçĕм пытăр ăнса, пурнăç пултăр тĕкел.

Чи хавас ĕмĕтрен вăй илен сăмахсем

кĕлтуни пек анчах илтĕнсен, хăш чухне

шухăша сӳлетен туйăмсем çуралаççĕ.

Тĕлĕнетĕп шалтах тепĕр чух, тăвансем:

кам пытарнă хĕвел савнă тусăн чунне?

Сивĕре те ачаш чечексем çурăлаççĕ!

Çĕнĕ комментари хуш