Кинемипе мучи

Николай Карай | Сăвă | автобус | 618


Иртен вара паян тулта

Çумăр çăвать ут куçленсе.

Ларатпăр пĕчĕк вокзалта

Автобус килессе кĕтсе.

 

Урисемпе хиркелешсе

Кутăнлашать чĕчĕ ачи.

Кинемее хулран тĕксе:

"Варук мар-и эс?" — тет мучи.

 

"Варук".

"Çемен эп".

Пĕр-пĕрне

Ал пачĕç кăмăллăн кулса.

 

Саспах калаçрĕç. Вĕсене

Ан чăрмантар сăмах хушса.

Мучи хуллен пӳрнисемпе

Якатрĕ шурă сухалне.

 

"Самолетпа ыраи ирпе

Каятăп, — тет, — мăнук туйне".

 

"Эп, — терĕ кинемей ăна,

Турткаласа тутăр вĕçне, —

Каятăп пысăк хулана

Ача пăхма мăнук патне..."

 

Вĕсем хĕрсе калаçнине

Итлес килетчĕ ман ларса.

Вĕсеи хитре калаçăвне

Автобус татрĕ кăшкăртса.

add comment Çĕнĕ комментари хуш


Ят:
Хăвăр шухăша çырса пĕлтерĕр:

Ă ă Ĕ ĕ Ç ç Ÿ ÿ Ӳ ӳ « ... » —
Хаклав:
Шухăшĕ:
Чĕлхе илемлĕхĕ:
Содержанийĕ: